Timosjenkop Janukovitj assortorpaa
Janukovitjip qinersinermi ajugaasutut imminut suaarutiginninnera Timosjenkop assortorpaa, eqqartuussivitsigullu suliassanngortinneqarnissaa siunniullugu:
- Janukovitj Ukrainemi præsidentiunngilaq. Tamanna aalajangiusimavara, qanorluunniillu siunissami pisoqaraluarpat isumaga allanngortinnavianngilara, Yuliya Timosjenko qinersinerup kingorna siullermik oqaaseqarnermini oqarpoq.
Innuttaasulli akerliussutsimik takutitsinissaat kajumissaarutiginngilaa, soorlu 2004-mi Orange Revolutionimik taallugu taamaaliortoqartoq.
Yuliya Timosjenko Janukovitjimut taamanikkut aamma illuatungiliuppoq.
Februaarip ulluisa arfineq-aappaanni præsidentimut qinersisoqarmat Viktor Janukovitj ajugaavoq, kisitsisit pisortatigoortumik saqqummiunneqartut naapertorlugit 880.000-inik amerlanerussuteqarluni.
Yuliya Timosjenkolli tamanna assortorpaa.