Timmissat sului savallu anaat itsarnisarsiuunik eqiiallatsitsipput
Itsarnisarsiuut sulinerat Nunatta Katersugaasivianeersut siuttuuffigaat taakkulu Danmarkimi katersugaasivissuaq suleqatigaat. Misissuinermi paasiniarneqarpoq Nuup eqqaani tammatsaaliugassat sumiinnerisa nalunaarsornissaat.
- Nuna tamakkerlugu itsarnisarsiuunut soqutiginaatillit sumiiffiit 5.000-init amerlanerupput. Paasiniarparput taakkunannga sorliit erlinnaateqarnerunersut. Uani piffissaq apeqqutaasorujussuuvoq. Nunap allanngoriartorneranit ajoquserneqannginneranni arlallit piaartumik suliarisariaqarput. Qujanartumillu Danmarkimi katersugaasivissuarmiit immikkut ilisimasallit suleqatigaavut, katersugaasivimmi inspektøri Paulina Kleinschmidt Knudsen Nunatta katersugaasivianeersoq KNR.gl-mut oqarpoq.
Sapaatit akunnerini pingasuni sulinermi nassaarfiit suli allanngorpiarsimanngillat nassaarineqarfiat nuna qeriuaannartumiimmat. Sumiiffinnili allani nassaat asiunerusumapput naak oqaluttuassartalissuugaluarlutik.
- Immikkut ilisimasallit arlariiaat angalaqatiginerisigut nassaatta assigiinngitsunik nassuiaasersornissaat periarfissaqarnerulerpoq. Saarngit, issoq ujaqqallu angerlaappagut. Taakku misissoqqissaarneqareerpata iluatinnaatilimmik ilisimasaqalissaagut ingerlariaqqinnissatsinnut iluaqutaasussamik, Danmarkimi katersugaasiviissuarmi ilisimatusartoq Henning Matthiesen oqarpoq.
Nunatsinni pueqqorajunnera pissutigalugu itsarnitsat allanngorpiarneq ajorput aamma nunap iluaniippallaanngikkaluaraangamik. Taamaammat itsarnisarsiuut Nunarput sullivigissallugu nuannarivittarpaat.
- Nassaarisatsinni timmissap sulua suli meqqulik immikkuullarissutut taasariaqarpoq. Suluk taanna hundredenik arlalinnik pisoqaassuseqarpoq silalli kiappallaannginnera pissutigalugu allanngorpiarsimanngilaq. Sumiiffinni allani suluup meqqui nungoreersimassagaluarput. Aamma savat anaat hundredenik arlalinnik pisoqaassusillit soqutiginarluinnarput. Taakku misissornerisigut paasisinnaavarput ukiut 500-ut matuma siorna savat sunik nerisinneqartarsimanersut. Taamaasilluta itsaq pissutsit misissornerannik suliarput ingerlateqqissinnaavarput, qallunaatsiaat pillugit immikkut ilisimasalik Christian Koch Danmarkimi katersugaasivissuarmeersoq oqarpoq.
