Timmissat qaqutigoortut aatsitassarsiortussanit inangerneqalersut
Tunumi Jameson Landimi timmissat inaata illersukkap killeqarfia, molybdænimik piiaaveqalernissaa pissutigalugu nuunneqartussanngortorlu, timmissat pillugit peqatigiiffik Timmiaq taama nalunaarpoq.
- Pinngortitamik illersuiniaqatigiit Nunarput malinnaaffigilluarpaat, taamaammat aningaasarsiorniaannarluni pinngortitamik ukiorpassuarni illersukkamik tunulliussilluni aatsitassarsiorneq pingaartinneqarnerussappat, Nunarput iluanngitsumik inississavarput, peqatigiiffiup siulittaasua Hasse Hedemand Sermitsiamut taama oqarpoq.
Jameson Landimi nuna paarnaqutaannalik eriagisassatut Nunatta 1988-imi aalajangiuppaa, tassami tamaani nerlerit siorakitsut nerlernarnallu ingammillu timmissat allat qaqutigoortut piaqqisarmata.
Canadami suliffeqarfik molybdænimik piiaanissaminik akuersissummik 2008-mi pisoq nunap eriagisap avannaatunginnguani qanittukkut piiaalernissaa ilimanarsivoq. Suliffeqarfik Quadro Mining talittarfimmik, mittarfimmik aqqusinniornissamillu pilersaaruteqarpoq. Taamaammat pinngortitamut naalakkersuisup Anthon Frederiksenip nuna eriagisaq atorunnaarseriarlugu masarsoqarfimmik Ørsted Dal-imik taarserniarpaa, nunalu tamanna avannarpasinnerusumiippoq.
Naalakkersuisup taama iliorniarnera timmissanik illersuiniaqatigiiffiup Timmiap Danmarks Miljøundersøgelsillu isoraat Sermitsiamullu oqaatigalugu timmissat piaqqiortartut qulingiluat nunap ilaanut tassunga nuussinnaanissaat qularnartoq.
