Timmissat pillugit nalunaarut allanngortinneqassanngilaq

Inatsisartuni ilasortap Siumumeersup Ole Thorleifsenip timmissat pillugit nalunaarutip allanngortinneqarniannginera pakatsissutigaa.

Ole Thorleifsenip neriuutigisimagaluarpaa Upernavimmiut piniartut miterniaqqissinnaalerlutillu appanniaqqissinnaalissasut.

Nunanit allanit allakkatigut akerliusorpassuaqarnera pissutigalugu naalakkersuisut nalunaarummik allanngortitserusukkunnaarput, taamaattoqarneralumi Ole Thorleifsenimut, inatsisartut aalisarnermut piniarnermullu ataatsimiititaliami ilaasortamut pakatsinanngitsuunngilaq.

- Naalakkersuisut sanngiipput, danskinit nunatta avannaani timmisat pillugit ilisimasaqanngitsunit allagarsiortoramik tunniutiinnaramik, Ole Thorleifsen oqarpoq.

Ole Thorleifsenili tunniutiinnarnianngilaq, Upernaviummi eqqaani timmisat pillugit paasissutissat siaruarniarpai, akerlerilluinnarpaami timmissanik upernaakkut piniarsinnaannginneq. Ole Thorleifsenni piniartut naammagittaaliummik aallagaqarnissaat maanna kajumissaarutigaa, piniartullu uunga allassinnaapput: serfat@greennet.gl