Timmissat nualluutaata nunatsinnut siaruaannissaa ilimagineqanngilaq

Aasiap Kangiata kujataani timmissat nualluutaata siaruaakkiartulernera ernummatsigineqaqisorlu aqukkuminnaatsinneqaqaaq.

Europamili taamarsuaq ajortigisimanavianngitsoq, nunarsuaq tamakkerlugu peqqissutsimut kattuffiup pisortaa. Shigeru Omi oqarpoq.

Taanna sapaatip-akunnerata tulliani Københavnimi timmissat nualluutaat pillugu isumasioqatigiittoqarnissaanut atatillugu taama oqarpoq.

2003-imi decembarimiit februaarimi 2004-p tungaanut timmissat nualluutaat Aasiap Kangiata Kujataani nunanut assigiinngitsunut arfineq-pingasunut siaruaappoq.

Kingorna nunanut allanut arfinilinnut tuniluuppoq, maannalu Europamut annguppoq, tassa Rumæniamut Tyrkie-mullu anngukkami. Shigeru Omi-llu oqarnera naapertorlugu, nualluut taanna Europamut anngutissagaluarpat upalungaarsimaffigineqarpoq.

Taamatuttaaq nunatsinni uumasut nakorsaat Lasse Holm oqarpoq nunatsinni timmissanut tunngatillugu ernumanartoqanngitsoq.

- Maannakkuugallartoq naliliinerput naapertorlugu ernumanissatsinnut peqqutissaqanngilagut. Nappaatip taassuma siaruaakkiartornera soorunami malinnaaffigaarput, soorlu timmissat aallartartut sumut ingerlaarnerat suminngaanneernerallu alaatsinaaqqissaarlutigu.

Nunatsinni timmissat aallartartut, timmissat nunani allaniittut soorlu Aasiameersut uloriagineqartullu attaveqarfigineq ajorpaat, taamaattumik ernummatsissaqanngilaq, uumasut nakorsaat Lasse Holm oqarpoq.

Taanna aperaarput, nunatsinni timmissat nualluutaat atuutileriataassagaluarpat qanoq pisoqarsinnaanersoq.

Tassunga atatillugu Danskit upalungaarsimanerannut ilaavugut, annermik timmiaatit tunillatsinnissaat maanna ernummataaneruvoq, taakkulu maani pigineqanngillat, taamaattumik isumaqanngilanga nualluut taanna maanga anngukkumaartoq.

Lasse Holm aperaarput, nunatsinni appat mitit assigisaallu kalaallinit mamarineqartaqisut, malittarisassiuunneqarsimanersut.

- Naamik, taakkununnga tunngatillugu nalinginnaasumik eqqiluisaarneq kisimi sakkussaavoq, Lasse Holm oqarpoq.

Nangipporlu:

- Nualluummik tamatuminnga tunillatsissimasut tassaanerupput, timmiaateqarfinni sulisut timmissat anaasa pujoralaanik najuussuisimasut.

Nualluut tunillaagaangami timmissat anaaniit aallaaveqartarpoq, taamaattumik igassagaanni iluamik saliilluarneq pisariaqarpoq, Lasse Holm oqarpoq.

Taanna erseqqissaavoq, timmissat nerinerisa kingunerisaanik nappaatip tunillaassisimanera suli naammattoorneqarsimanngitsoq.

Københavnimi timmissat nualluutaat pillugu ataatsimiinnermi ataatsimiissutigineqarpoq, europami nunat assigiinngitsut 52-t akornanni nualluut tamanna inunnut tuniluutilissagaluarpat qanoq sillimaniartoqarsinnaanersoq.

Timmissat nualluutaat taaguutilik H5N1 inunnut tunillaasinnaavoq, tunillaassisinnaanerali annikitsuinnaalluni.

Maannamut inuit Aasiamiittut 118-t nualluummik tamatuminnga tunillatsissimasut ilisimaneqarput, taakkulu affaat toqoreerlutik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat