Timmissat nappaataat taamak uloriarnartiginngilaq

Danskit peqqinnissaq pillugu oqartussaasuisa timmissat nappaataat toqunartoq nunarsuaq tamakkerlugu siaruaannissaa aarleqqutiginngilaat.

Taamaalillutik Naalagaaffiit Peqatigiit peqqinnissakkut suleqatigiiffiata, WHO-p timmissat nappaataata siaruaannissaanut aarlerisut, akerlilerpaat.

Peqqinnissakkut Qullersaqarfiup timmissat nappaataat tuniluuttoq Danmarkimut takkutissappat ukiukkut influenza-tut taamaallaat ittuunissaa ilimagaat.

Suli ilisimaneqanngilaq nappaassuaq H5N1-mik taaneqartartoq inummiit inummut tuniluuttarnersoq. Massakkut timmissamiit inummut taamaallaat tuniluussinnaasoq ilisimaneqarpoq.

Nappaassuaq Danmarkimut anngutissaguni timmissat tuniniagaasartut taamaallaat eqqussavai, qitiusumi pisortaq, Peqqinnissakkullu Qullersaqarfimmi nakorsaaneq Else Smith oqarpoq. Timmissallu nappaammik eqqorneqartut tamarmik toqunneqassasut oqaatigalugu.

-Tamannali isumaqanngilaq inuit akornanni tuniluunnersuaqarnissaanik, Else Smith oqarpoq.