Timmissat nappaataat pillugu Europami misissuipput

Europami nunani arlaqartuni timmissat nappaateqarsoralugit maanna misissuisoqaleruttorpoq. Danmarkimi siumuisoqanngitsoq nunani allani siumuisoqarpoq.

Sverigemi qussuit sisamat toqungasut timmissat nappaataannik toqquteqarsimanersut misissorneqareersoq paasineqarpoq taassuminnga toqquteqarsimanngitsut. Ukiup taamaalinerani timmissat nalinginnaasumik toqquteqartarmata Sverigemi oqartussat aalajangersimapput iliuuseqaqqinniaratik. Timmissanilli amerlasuunik toqungasunik naammattuuisoqassappat aatsaat qisuariarniarput.

Schweizimi timmissat qulit toqungasut aammattaaq taamatut misissorneqareersut paasineqarpoq taakku aamma timmissat nappaataanik toqquteqarsimanngitsut. Taqqavanilu oqartussat sillimajuarniarlutik nalunaaruteqarput.

Italiami, Østrigimi Tysklandimilu timmissat nappaataannik naammattuuisoqarsimavoq.

Frankrigimi virusimik naammattuuisoqarpoq, oqartussallu ilimagaat siumorneqartoq taanna timmissat nappaatigissagaat.

Hollandimi qussuit marluk toqungasut maanna misissorneqarput timmissat nappaataannik toqquteqarsimassanersut. Misissuinerlu suli naammassinngimmat sumik toqquteqarsimanissat ilisimaneqanngilaq oqartussallu nalunaarput apeqqutaaginnartoq timmissat nappaataat Hollandimut qaqugu anngutissanersoq.

Taamaammat Hollandimi oqartussat timmissat akiuussutissamik kapoorneqarnissaat aalajangiussimavaat sapaatillu akunnerata tulliani EU-mi peqqinnissaq pillugu ataatsimiititaliaq periusissamik saqqummiiffigineqassaaq.

Slovianiami Grækenlandimilu timmissat nappaataannik siumuisoqareerpoq, kiisalu Rumæniap illoqarfeeraani 31-ini naammattoorneqareerluni.