Timmissat nappaataat Danmarkimut qanilliartorpoq

Timmissat nappaataat Danmarkimut qanilliartorpoq. Sverigemi oqartussat ullumi nalunaaruteqarput Sverigep kujataani qeerlutuut marluk timmissat nappaataannik nappaatillit atomimik nukissiorfiup Oskarshamnip eqqaani naammattuuisoqarsimasoq. Tysklandimi oqartussat aamma nalunaarput qitsuk timmissat nappaataannik nappaatilik Tysklandimi naammattoorneqarsimasoq.

Sverigemi nunalerinermut ministeri tupaallanngilaq:

- Sverigep sineriaata eqqaani timmissat nappaataat naammattoorneqarsimammat tupaallanngilanga. Østersømi naammattoorneqarnissaa ilimagisimavara, Sverigemi nunalerinermut ministeri oqarpoq.

Rügen Danmarkimut Sverigemullu qanittuararsuuvoq tassanilu qitsuk timmissat nappaataanik H5N1-imik nappaatilik naammaattoorneqarsimavoq. Miluumasoq siulleq timmissat nappaataanik nappaatilik Tysklandimi naammattoorneqarpoq.

- Nunarsuaq tamakkerlugu miluumasut timmissat nappaataannik tunillatsittarnerat akuttusoorujussuuvoq, Inuussutissaqarnermut aqutsisoqarfimmi uumasut nakorsaat Annette Drisling oqarpoq.

Sverigemi Tysklandimilu timmissat nappaataannik naammattuisoqarnerata kingorna Danmarkimi upalungaarsimaneq sakkortusineqassanngilaq, Inuussutissaqarnermut aqutsisoqarfimmi allaffimmi pisortaq Birgit Henriksen nalunaaruteqarpoq.

- Timmissat aallartartut Sverigemut apuussimapput. Danmarkimi timmissat nappaataannik naammattuuisoqassagaluarpat ilisimavarput qanoq iliussanerluta, taamaattumik massakkuugallartoq iliuuseqarnianngilagut, Birgit Henriksen naggasiivoq.

Timmissat nappaataat toqqutaasartoq, H5N1, qaammatip kingulliup ingerlanerani nunani 20-ini naammattoorneqarpoq.

Inuit timmissanik nappaatilinnik passussinerminni qaqutigut tunillatsissinnaasarput. Ukiut pingajuata affaata ingerlanerani inuit 170-t timmissat nappaataannik napparsimalersimapput 93-illu toqqutigisimavaat.