Timmissat nappaataat Danmarkimut qanilliartorpoq.
Tyskit qeqertaanni, Rügenimi, qussuit H5N1-imik tunillanneqarsimasut paasineqarpoq, Danmarkillu ilaani qussuit toqungasut nassaarineqartarlutik. Qussuit nalinginnaasumik toqquteqarsimasinnaapput nakorsallu uippallertoqartariaqanngitsoq erseqqissartuarpaat.
- Inummiit inummut nappaat tuniluuttuutilissaguni virusip sananeqaatai allanngortariaqassapput. Allanngorsimaneralu uppernarsarneqarnikuunngimmat ullumikkut ernumasoqartariaqanngilaq, Hvidovrep Napparsimmaviani nappaatit tuniluuttut misissuisarfianni nakorsaaneq, ilisimatooq nunarsuarlu tamakkerlugu nappaatit tuniluuttut toqussutaasartullu pillugit ataatsimiititaliami ilaasortaq Jens Ole Nielsen taama oqarpoq.
Asiap kangiani kujasinnerusortaanilu ukiarmi timmissat nappaataat, H5N1, siaruaappoq. Ukioq mannalu Asiami inuup inuuneranik naleqareerpoq.
Timmissat naluumasut nujuartat, soorlu qussuit qeerlutuullu, timmissat nappaataannik siaruaasuupput. Timmissallu nujuitsut inunnik tunillaasarput. Timmissallu nappaataat ulorianarluinnartoq, H5N1, Kinap kujasinnerusortaani 90-kkut qiteqqunnerani timmissanit nujuitsunit inunnut tuniluutilersimanissaa ilimagineqarpoq.
Tamatumalu kingorna Thailandimut, Vietnamimut, Cambodiamut, Indonisiamut Asiamilu nunanut allanut siarumarsimanissaa ilimagineqarluni.
Timmissat nappaataat, H5N1, tusarneqaqqaarpoq 1997-imi Kinap illoqarfiisa ilaanni Hong Kongimi inuit toqqutigimmassuk. Qassit toqqutigisimassaneraat ilisimaneqanngilaq isumaqartoqarsimammat timmissat kisimik nappaatigisinnaagaat.
Inuilli 24-t 2004-imi timmissat nappaataannik toqquteqarput.
Timmissat naluumasut nujuartat angalaartarnerminni nappaat siaruarterpaat Asiamilu inuit 32-t siorna nappaat taanna toqqutigaat.
Januaarip februaarillu qaammataani timmissat nappaataat siarumaappoq.
Inuit sisamat Tyrkiami nappaammik toqquteqarput, Irakimi inuup ataatsip toqqutigaattaaq.
Danmarkimi timmissat nappaataat atuunnersoq suli uppernarsineqanngilaq, taamaakkaluartorli danskit oqartussaasut mianersoqqusereerput timmiaatillu tamarmik illup iluaniisinneqarnissaat kajumissarutigineqareerluni.
