Timmissat nappaataat Danmarkimut qanilliartorpoq

Tysklandip avannaani qeqertami Rügen-imi qussunnik marlunnik timmissat nappaatannik nappaateqartunik nassaartoqareernerata kingorna, maanna nalunaarutigineqarpoq Danmarkimi qussunnik toqungasunik arlalinnik nassaartoqarsimasoq.

Bornholmimi qussuit sisamat toqungasut nassaarineqartut Århusimut misissugassanngorlugit nassiunneqarput, Falsterimilu, Lollandimi, Sjællandimilu qussunnik toqungasunik aamma nassaartoqarsimasoq nalunaarutigineqarluni.

-Rügenimi timmissat nappaataannik timmissanik toqungasunik nassaartoqarnerata kingorna, soorunami sillimaneruleqqavugut, naqissuserusupparali ukiut tamaasa qussunnik toqusoqartarmat, uumasut nakorsaat Jørgen Vendelboe DR-mut oqarpoq.

Qussuit 16.000-t missaanniittut ukiut tamaasa Danmarkimi toqusarput, Danmarkimilu timmissanik soqutigisallit kattuffissuannit oqaatigineqarpoq, qussummik toqungasumik takusaqaraanni uippallertoqartariaqanngitsoq.

-Nappaat inummiit inummut tunillaassuutilissaguni nappaat allanngoqqaartariaqarpoq. Taamaammat ippassarniit ernumanerusariaqanngilagut, professori Jens Ole Nielsen Hvidovre Hospital-imi nakorsaaneq, Peqqinnissakkullu Qullersaqarfimmi ilaasortaasoq oqarpoq.

Danmarkimi timmissat nappaataannik toqunartumik suli nassaartoqanngilaq, danskilli pisortai nalunaarput timmiaatit tamarmik isersimatinneqassasut.

Nakorsat aamma nappaassuarmut ernumaqqusinngillat.