Timmissat nappaataat Canadami
Timmissat nappaataannik toqquteqarneq Canadami peqqissutsimut ministerip, Rosa Ambrosep, tusagassiortunik ippassaq katersortitsinermini uppernarsarpaa, aammali erseqqissaatigalugu allanik taama nappaateqartoqanngitsoq.
- Allanik napparsimasoqanngimmat tamanut oqaatigissavara. Tunillatsinnissaq annikitsuararsuuvoq. Nappaat inummiit inummut tunillaassinnaanersoq maannamut uppernarsineqarnikuunngilaq, Rosa Ambrose oqarpoq.
Nappaammik toqquteqartoq Kinami juullisioreerluni Canadamut uternermini timmisartumi peqqinngitsutut misigaaq, inuunilulerlunilu. Kissarneqarlunilu niaqorluppoq, tikereerlunilu suli ajornerulermat napparsimmavimmut ukiortaami unitsinneqarpoq, ullullu marluk qaangiummata toqulluni.
Allat marluk, taassuma Kinamut angalaqatai, tunillatsissimanngillat, toqusullu ilaqutai, takusinnaasat naapertorlugit, aamma tunillatsissimagunaratik.
Nappaat timmissanit, kukkukuuniunerusoq, tuniluuppoq. Inuit nappaammit tunillatsikkaangamik navianartorsiortorujussuusarput. Tunillatsittoqaraangat tunillatsittut 60 procentii toqusarput.