Timmissat nalunaaqutallit pingaaruteqaqaat

Timmissat nalunaaqutsikkat Pinngortitaleriffimmut tunniunneqanngikkaangata paasissutissat assut pingaarutillit annaaneqartarput.
Allattoq Elisa Isaksen
marsip 05-at 2008 16:56

Taama isumaqarpoq, Cartsten Egevang, timmissat imarmiut pillugit immikkut ilisimasalik.

Timmissat nalunaaqutsikkat soorlu Nuummi kalaaliaqqami tuniniarneqartut nammineq takusarsimanerarpai.

- Timmissat qanoq ingerlaartarnerinik paasissutissiinernut nalunaaqutsersuinerit asorujussuaq pingaaruteqarput, Carsten Egevang oqarpoq.

Nunatsinniinnaanngitsoq qanoq ingerlaartarnerisa ilisimaneqarnissaat pingaartuunerarpaa aammali nunatta qanitaanni nunani qanoq ingerlaartarnersut.

Radioaviisimi paasisavut naapertorlugit soorlu Nuummi kalaaliaqqami timmissat nalunaaqutsikkat tuniniarneqartarsimapput, tamanna pillugu Carsten Egevang oqarpoq:

- Aappi, tusarnikuuavara, uangalumi nammineq aamma takusimavakka. Nangilluni oqarpoq, timmissat nalunaaqutsikkat pisarineqartartut tamarmik Pinngortitaleriffimmut annguttannginneri nalunngikkitsik.

Nalunaaqutalimmik tunniussinermi akissarsiassaq suunngitsuaraasoq isertunngilaa tassa 25 koruuniinnaammat.

Isigattaleraanni 50 koruunit. Timmiartaa allanngortinnagu tunniukkaanni 100 koruunit.

- Tassalu aningaasanngoraanni naamik suunngilaq, Carsten Egevang oqarpoq.

Tunniussinngitsoortoqartarneratigut tassa paasissutissat pingaarutillit annaaginnarneqartarnerlutik:

- Paasissutissat annaaneqartarput. Uagutsinnut assut pingaaruteqarpoq paasissallugu nunatsinni nunanilu allani timmissat qanoq ingerlaartarnersut paasissallugu,

Carsten Egevang naggasiivoq.