Timmissat issittumiittut mingutsitsinermit eqqugaapput
Biologip Jennifer Provencherip, Victoria Universitymeersup, suleqatinilu timmissat assigiinngitsut aqajarui misissorsimavaat, timmissallu ikigisassaanngitsut aqajaruminni plastikeqartut paasineqarluni.
Silap pissusaata allanngoriartornera pissutigalugu Nunarsuatta issittortaani immakkut angallanneq annertusigaluttuinnarpoq, takornariartitsisarnerlu aamma annertusiartorluni. Tamakku ilaatigut pissutaasimanissaat eqqoriarneqarpoq, eqqakkammi amerliartuinnaramik.
Naalagaaffiit Peqatigiit avatangiisit pillugit suleqatigiiffiata UNEP-ip ilisimatitsissutigaa plastiki uumasunut tamanut pingaartumillu timmissanut ulorianartorujussuusoq, plastikkermi arrortikkuminaassinnaammat.
Jennifer Provencherip oqaatigaa timmissat issittumiittut aqajaruminni plastikkeqartut siumortarsimallugit, erseqqissaatigalugulu plastikkimik timmissani maannamut nassaartarsimallutik, kisiannili aalisakkani, nannuni uumasunilu allani issittumiittuni nassaarsinnaassagunarlutik.
