Timmissat Alaskami toqorarput
Timmissat Petrel-imik taaguutillit 1600-t missaannik amerlassusillit, Alaskap sineriaani sissanut toqungallutik tippussaajorarsimasut, Anchorage Daily News allaatiginnippoq. Sunarpiaq timmissat toqqutigisimaneraat suli paasineqanngilaq.
Timmissat umiarsuarnut aportarsimanngikkunik perlersimanissaat ilimagineqartoq biologit ilaat oqarpoq.
Timmissat 100-lippassuit akunnerup affaata ingerlanerinnaani toqoralersimasut, saattuarniat ilaat takunnissimasoq biologinut oqaluttuarpoq.
Siornatigut timmissat taakkua arlalikkaarlutik toqorartarsimapput, aatsaalli taamak amerlatigisut ataatsikkut toqorarneri siumorneqarpoq, timmissanik ilisimatooq aggersarneqarsimasoq Art Sowls oqarpoq.
Toqorarfiup nalaani najugalik biologi Reid Brewer oqarpoq timmissat toqorarsimasut nerilluartarsimarpasillutik pualasut. Aamma uuliamik mingutsinneqarsimanerinik ersittoqannginnerarpaa.
Timmissalli arlalissuit qungasaat naperarsimapput, ilimagineqarporlu aporarlutik toqorarsimassasut. Umiarsuit qulliinut timmissat ornigisaqartarsimanissaat ilimagineqarpoq.
