Timmissanut killilersuineq inatsisartut oqaluuserissavaat

oktobarip 20-at 2006 10:43

Inatsisartuni ilaasortat ualimut sapaatip-akunnera naanersiulertinnagu arlalissuarnik oqaluuserisassaqarput.

Ataatsimiinneq aallartillugu apeqquteqaatit sisamat oqaluuserineqassapput. Taakkulu inatsisartunut ilaasortanit oqallisigineqarluassagunarput.

Soorlu Jens Lars Fleischerip Siumumeersup timmissanik eqqissisimatitsineq oqaluuseritikkusuppaa.

Taassuma tunngavilersuinermini oqaatigaa timmissanik killilersuinermi avannaamiut sakkortuumik eqqorneqartut. Tassami taakkununnga appanniarneq miterniarnerlu ajornarsisinneqangajalluinnarsimavoq.

Apeqquteqaatit oqallisigineqareerpata inatsisissatut siunnersuutit akileraartarnermut tunngasut oqaluuserineqassapput. Aammattaaq meeqqanut ileqqaartitsinissamik siunnersuut aappassaaneerlugu oqaluuserineqassaaq.

Tamatuma akuerineqarnissaa qularutissaanngilaq, tassami naalakkersuisooqatigiit isumaqatigiissutaanni ilaareermat.

Tassalu taannaavoq meeqqanut ileqqaartitsisarnissamut siunnersuut, siorna Siumup aamma IA-p naalakkersuisooqatigiikkunnaarnerannut pissutaasoq.