Timmisartuutileqatigiiffik AUL-imik pisiniarnerminit tunuarpoq
Arctic Umiaq Line-imik pisinissamut isumaqatiginninniaqataasup ingerlataasa ilaat, Air Alpha, danskit suliffeqarfiussuanniit ullumi tunuarpoq.
Suliffeqarfissuaq, Arctic Travel Group, danskit angalatitseqatigiiffiinik pingasunik ingerlataqalerpoq, tassaasunik: Topas Adventure Travel, Albatros aamma Profil Rejser.
Suliffeqarfimmi siulersuisunut siulittaasunngorlaaq, Søren Rasmussen, Radioaviisimut oqarpoq, Arctic Umiaq Line-imik pisinissap millionerpassuarnik naleqartussaanera pissutigalugu Air Alpha tunuartoq.
Søren Rasmussen-ip taamaattoq erseqqisasatigaa, Air Alphalu isumaqatigiikkunnaarnatik. Suliassallu eqqarsaatigissagaanni Air Alpha sukkulluunniit inissaqartuaannassasoq.
Arctic Umiaq Line-ip pisiarinissaanut neqeroorut Arctic Travel Groupip oktoberip ulluisa 14-ianni tunniuppaa.
Namminersornerullutik Oqartussanut isumaqatigiinniarnerit qanittukkut naammassinissaat siulersuisunut siulittaasup ilimagaa. Taamaalillutillu atsioqatigiissinnaanngussapput.
