Timmisartuussisoqarsinnaagaluartoq tunuarsimaartoqarpoq
Nutartigaq 9.32
Air Greenlandip timmisartuutaanut ilaasussanut ingerlariaqqissinnaajunnaaqqasunut nuannerpallaanngitsumik maanna tusarliussassaqarpugut. Arfineq-pingasunut oqaraluarpugut, Danmarkip Kalaallit Nunaatalu silaannartaani timmisartuussinerit tamarmik aallarteqqinneqartut.
Paasisavulli kingulliit tassaapput, Air Greenland timmisartuusserusunngitsoq, timmisartuussinissamut aamma qinnuteqarusunnani.
-Isumannaallisaaneq tamanit pingaarnerpaasoq, Air Greenlandimi paasissutissiisartoq Pia C. Bang oqarpoq.
Arsakut annikitsuararsuugaluarpataluunniit silaannaq arsakunik akulik aqqusaarlugu timmisartuussissagaanni atortut iluarsineqarsinnaajunnaarlutik ajoquserneqarsinnaanerat unitsitsinermut pissutaatinneqarpoq.
Taamaammat Nuummiit timmisartuussinerit tamarmik ullumi unitsinneqarput.
Naalagaaffiup mittarfeqarfianut timmisartuussinissamik qinnuteqartoqassanersoq Air Greenlandip maannakkorpiaq nalilersuleruttorpaa, inuiaqatigiinnullu paasissutissiinissamik neriorsuuteqarlutik.
Timmisartuutileqatigiiffiup tusarliuppaa pilersaarutit malillugit Københavnimiit Kangerlussuarmut boeingimik immikkut timmisartuussinissaagaluaq unitsiinnarneqartoq, ilaasussat ornitaannut apuunneqarsinnaanngimmata, aammalu Kangerlussuarmi unnuiffissat naammannginnerat pissutigalugu.
Airbusili pilersaarutit malillugit Københavnimiit aallassaaq, Avannaaliartullu ilaasut ornitaminnut ullumikkut apuunneqarnissartik ilimagissavaat. Kangerlussuarmiit Københavnimut aallarnissaq unitsiinnarneqarpoq, missingersuutit malillugit Københavnimut minnissap nalaani putsut arsakunik akoqassangatinneqarmata.
