Timmisartuussisarsimanerit misissorneqartariaqarsorai
USA-p kilitsissiaqarfiata CIA-p Kalaallit Nunaat aqqusaarlugu tigusanik timmisartuussisarsimanera ilungersunartutut nalilerini, tamannalu tunuliaqutaralugu misissuisoqartariaqartoq, Danmarkip ministeriunerata Anders Fogh Rasmussenip oqaatigaa.
Allattoq Mads Lynge
januaarip 31-at 2008 07:18
Aallakaatitassiap piviusulersaarutip aallakaatinneqareernerata kingorna Anders Fogh Rasmussen taama piumasaqarpoq.
- Tigusanik timmisartuussisarsimanerit ilungersunartutut nalilerivut, Danmarkimi naalakkersuisuusugut oqariartuutigereerparput, ministeriuneq oqarpoq, nangipporlu:
- Nunat tamat aalajangersagaannik unioqqutitsineruvoq, akuersaarnartuunanilu, Anders Fogh Rasmussen oqarpoq.
Narsarsuatigoorlugu tigusanik timmisartuussisarsimanatik USA nalunaaruteqareerpoq, tamannalu ilumoortortaqarsinnaanersoq misissorniaritsik ministeriunerup oqaatigaa.
Nunanut allanut ministeri Per Stig Mølleri naalakkersuisut siulittaasuannut Hans Enoksenimut tamanna pillugu ullumi ilisimatitsissuteqarniarpoq.
