AWG2016 Timmisartuussinissat aqagu ullaatungaanut kinguartinneqarput

Kangerlussuarmiit Nuuliaassuinissat kinguartinneqaqqipput, sapaammilu ullaatungaani aatsaat aallartittussanngorlutik.
marsip 05-at 2016 22:13
Nutserisoq Arnaq Nielsen

AWG-mi peqataasussat 600-t missaaniittut Kangerlussuarmi sapernusut unnuisussanngorput. Kangerlussuarmi mittarfiup pisortaa Rita Müller taama nalunaarpoq.

- Timmisartoq ataaseq Nuummut unnummut missinnaasimagaluartoq timmisartortartut misileerusunngillat. Minneratami nalaani sila sivikitsuinnarmik unerisimavoq. Taakkua piumaneruaat angalasussat qasuersaarnissaat, Rita Müller KNR-imut oqarpoq.

Tamatuma saniatigut paasissutissiissutigaa timmisartuussinerit aqagu sapaammi ullaatungaani aallartinneqassasut. Timmisartuussinerit nalunaaqutaq 11.20 aallartissapput, ullaassakkullu nalunaaqutaq marlup tungaanut ingerlassallutik, Rita Müller oqarpoq.

Tamatumalu kingunerisaanik ammaanersiornermi peqataasussaraluit affaat angumersisinnaanngitsut timmisartoqarfiup pisortaata ilanngullugu paasissutissiissutigaa. Ullumikkut tikittut kingulliit timmisartoq nalunaaqutaq 19.05 aallartussaq ilaaffigissavaat, taakkualu arfineq-pingasup missaani Nuummut missapput.

Aqagu tikittussat, imaappoq maanaaqquttussat affaasa missaasa ammaanersiorneq arfineq-pingasunut pisussaq angumerissanngilaat, Rita Müller oqarpoq.

Rita Müllerip ilanngullugu oqaluttuaraa angalasussat ilaat qasoqqasut, tamannalu timmisartortartut aalajangiinerminni tunngavilersuutiminnut ilaatissimagaat.

- Angalasut ilaat Kangerlussuarmut ullumi pinnginnerminni nalunaaquttat akunnerini qulingiluani busserlutillu timmisartorsimapput, Rita Müller oqarpoq.

Timmisartortartut timmisartuussinissat unnummut aallartinnginnerani nalilersuigamik tamanna tunngavilersuutaannut ilaavoq. Timmisartuussinissammi sila pitsannguuminngippat kinguartinneqaqqissinnaammata. Sapaammulli kinguartitsisoqarpat angalasut qasuersaarsinnaapput. Timmisartorsuit tallimat AWG-mi peqataasussanik angallassisut

Kangerlussuarmut aqagu pissapput. Taakkulu aatsaat sapaatip unnukkuani ataasinngornerullu unnuaani ingerlaqqissapput, taakkua ammaanersiornissaq angumerissanngilaat.