Air Greenland aamma Timmisartumi sulisut Kattuffiat Københavnimi isumaqatigiissitsiniartarfimmi ullumi isumaqatigiinniaqqipput.Assi: Christine Hyldal/ KNR

Timmisartuussinermi aaqqiagiinnginneq: Tallimanngornermiit suli suliumajunnaartoqarsinnaasoq

Isumaqatigiinniarnermit suli paasissutissaqartoqanngilaq. Isumaqatigiinniartut qanoq sivisutigissanersut kimilluunniit ilisimaneqanngilaq.

Air Greenlandip aamma Timmisartuni sulisut Kattuffiata akornanni aaqqiagiinneq ulluisa aappassaanik ingerlanneqarpoq.

Illuatungeriit taakku marluk Københavnimi isumaqatigiissitsiniartarfimmi akileriillutik issiapput, taakkumi timmisartumi saqisunut isumaqatigiissutissaq nutaaq isumaqatigiissutigisinnaanngilaat.

Isumaqatigiinniarnernit paasissutissiisoqanngilaq. Tamannalu qanoq sivisutigissanersoq kimilluunniit ilisimaneqanngilaq.

Isumaqatigiissitsiniartarfik

 

- oqartussaavoq sulisitsisut sulisullu nutaamik isumaqatigiissuteqarnissamut isumaqatigiissinnaanngikkaangata akuliuttartoq. 

 

- aaqqiagiinnginnerit aamma suliumajunnaarnerit mattussinerillu pinngitsoortinnissaannik sulissuteqartarpoq.

 

- illuatungeriit isumaqatigiinniarnissaannut pinngitsaaliisinnaavoq, akornannilu isumaqatigiissitsiniartuusinnaalluni.

 

- suliujumajunnaarnissat mattussinissallu sapaatini akunnerni marlunni kinguartinnissaanut pisinnaatitaaffeqarpoq. 

 

- Sankt Annæ Pladsimi Københavnimiippoq. 
 

Paasissutissarsiffik: forligsinstitutionen.dk

 

KNR-ip illuatungeriit ullumi oqaaseqartinniaraluarpai – taakkuli isumaqatigiinniarnerit ingerlaneranni nipangiusimasussaatigaagamik oqaaseqarsinnaanngillat.

Taamaammat maannakkut qulakkeerlugu ilisimaneqartoq ataasiinnaavoq, tassa tallimanngorneq decembarip aappaani suliumajunnaartoqarnissaanik aarlerisaaruteqarneq suli atuuppoq. Taamaammat timmisartut tamarmik uninngaannartinneqarsinnaapput.

AAMMA ATUARUK Ataatsimut isigalugu: Timmisartuutileqatigiiffimmi isumaqatigiinnginnermi maanna ima pisoqassaaq

Taamaattoqassanersorli suli nalunarpoq. Timmisartuutileqatigiiffik kingusinnerpaamik aqagu ualikkut isumaqatigiissuteqartoqanngippat suliumajunnaartoqarniarneranut ulloq sioqqullugu nalunaaruteqassallutik KNR-imut paasissutissiissutigaa.

Isumaqatigiissitsiniartartup suliumajunnaartoqarniarnera kinguartissinnaagaa

Allamimmi aamma periarfissaqarpoq. Isumaqatigiinniarnermimmi maanna aqutsisup tassa isumaqatigiissitsiniartartup suliumajunnaartoqarniarnera kinguartissinnaavaa.

Tassa imaappoq isumaqatigiissitsiniartartup suliumajunnaartoqarnissaanik ullunik 14-inik tassa decembarip ulluisa 16-iannut kinguartitsisinnaavoq. Aaqqiagiinngittoqarneranilu aaqqiissutissarsisoqanngippat suliumajunnaarniarneq sapaatinik akunnernik marlunnik tassa decembarip ulluisa 30-anut kinguartinneqaqqissinnaalluni.

AAMMA ATUARUK Immikkut ilisimasalik suliumajunnaartoqalersaarnemut: Suli tupaallannartoqariaannaavoq

Isumaqatigiissitsiniartartoq taamaaliussappat timmisartut nalinginnaasumik ingerlassapput.

Apriilimi aamma suliumajunnaartoqarnissamik aarlerisaaruteqartoqartoq

Kingullermik poorskikkut nalaanni apriilip aallartinnerani suliumajunnaartoqarnissaanik aarlerisaaruteqartoqarpoq.

Kisianni suliumajunnaartoqanngitsorluunniit tamanna taamaatiinnarneqarpoq. Dansk Metalimi Air Greenlandilu Københavnimi isumaqatigiissitsiniartarfimmi apriilip aappaani nutaamik isumaqatigiissuteqarput.

Illuatungeriit Isumaqatigiissitsiniartarfimmi ulloq ataasiunngitsorluunniit isumaqatigiinniareerlutik nutaamik isumaqatigiissusiorput. 

Nutaamik isumaqatigiissuteqarniarnermi timmisartumi saqisut akissarsiaqarnerulerusupput. Air Greenlandillu tamanna ilaatigut ammaffigaa, tamannali timmisartumi saqisut suliffiup piffissaanut atatillugu aalaakkaannerunissaanik piumasaqaatitaqarpoq. Piumasaqaat tamanna FPU-p akuererusunngilaa.

Suliumajunnaartoqassappat: 

2022-mi decembarip aappaata 16-iatalu akornanni angalasussaaguit billettissat utertissinnaavat.

Aamma billettit allanngortissinnaavat.

Angalanissat allanngortissagukku Air Greenlandip nittartagaanut isissaatik. Billettili angalatitsivimmit allamit pisiarisimagukku taakku attavigissavatit.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl