Timmisartuussinerit pissusissamisooqqilerput

Islandimi qaqqap innermik anitsisup qullaatsitai Nunatsinniit maanna qimagupput, tassalu Atlantikoq qulaallugu sisamariarluni ullumikkut timmisartuussisoqassaaq.
apriilip 23-at 2010 10:24

Air Greenlandip angalanissanut pilersaarutai sukumiisut, ippassaq pilersaarutigineqalersut iluatsittussanngorput,

Air Greenland timmisartunik Boeinginik pingasunik attartorpoq, Air Greenlandillu timmisartorsua Airbus peqatigalugu, ilaasussat ingerlariaqqinnaveersimagaluartut 1.300-it missaanniittut ikilisarujussuassavaat. Ilaasussat kingulliit 250-it aqagu aallarsinnaanissaat naatsorsuutigineqarpoq.

Timmisartut Boeingit attartukkat pingasut taakku Københavnimiit minutsinik arlaqanngitsunnguaannarnik kingusinaarlutik aallarput. Marluk Kangerlussualiartut, ataaseq Narsarsualiarpoq. Air Greenlandip timmisartorsua Airbus ippassarli aamma Kangerlussuarmiippoq.

Ullumikkut taamaatittutuaq tassaavoq Nuummiit Narsarsualiartussaq, Kujataami innermik anitsisumiit qullaatsitanik zone 2-mik taaneqartartumik suli peqarpoq, taqqavani timmisartuussisoqassappat tamanna immikkut akuerineqartussaalluni.

Ilaasussat kingulliit aqagu timmisartuussinnaassallugit Air Greenlandip neriuutigaa. Tamannalu ualip ingerlanerani paasissutissiissutigineqassasoq, timmisartuutileqatigiiffik ilisimatitsivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq