Timmisartuussinerit kinguaattoorput

Allattoq Carla Davidsen
septembarip 30-at 2005 18:21

Nuummi ualeq anorlingaatsiarnera pissutigalugu Kangerlussuup, Nuup Narsarsuullu akornanni timmisartuussinerit tamaasa nunatsinni timmisartuutileqatigiiffiup Air Greenlandip unitsiinnartariaqarsimavai.

Ilaasut Kangerlussuarmiittut aqagu aatsaat taamaalillutik Nuummut ingerlanneqarsinnaapput.

Suluusalik Dash 7 ataaseq aamma suli ingerlasinnaanngilaq. Taamaammat Nuummiit Maniitsoq aqqusaarlugu ingerlasussaq, GL 494, kinguaattuussaaq. GL 494 sapaatiuppat ullaatungaa nalunaaqutaq qulingiluat qaangerlugu tanneq pingasut aatsaat aallassaaq.

Alla aamma kinguaattuussaaq, tassa GL 495, Sisimiuniit Maniitsukkoorluni Nuummukartussaq, sapaatiuppat nalunaaqutaq ulloqeqqata qeqqanut aallartussanngorpoq.

GL 415 Nuummiit Narsarsualiartussaq aqagu nalunaaqutaq marlunut tanneq qulit aallassaaq, Narsarsuarmiit utissalluni nalunaaqutaq sisamanut tanneq qulingiluat.

Qulimiguulimmik Narsarsuarmiit ingerlasussat aallarfissaat piffissanut taakkununnga naleqqussarneqassasut, Air Greenlandimiit nalunaarutigineqarpoq.