Timmisartuussineq eqqorneqaratarsinnaavoq

Sillimaniarneq nutaarluinnaq eqqunneqarpat nunatsinnit nunatsinnullu silaannakkut angallassineq aappaagumiit kinguaattoorfiusalissaaq.
Allattoq Najaaraq Egede
decembarip 12-at 2007 06:30

Timmisartunik nakkutilleeriaaseq nutaarluinnaq aamma mittarfimmi timmisartunik mittunik aallartunillu nakkutiginniffik nutaarluinnaq Københavnip mittarfeqarfiani Kastrupimi atorneqalersussaq pissutaalluni angalasunut kinguaattoornerit – aamma Kalaallit Nunatsinnit Kalaallit Nunatsinnullu angalasunut – aappaagumiit eqquissagunarput.

’Qaammatini pingasuni siullerni kinguaattoortarnissat naatsorsuutigissavasi. Pisuusaartitsilluta misileraanitsigut paasivarput atuutileqqaarnerani nalunaaquttap akunnerata ataatsip missaani kinguaattoortoqartassasoq. Tamannalu angallattoqaleruttornerata nalaani pisassasoq naatsorsuutigaarput, mittarfimmi pisortaq Jesper Skou, Naviair-imeersoq, DR-imut oqarpoq.

Sillimaniarneq eqqarsaatigalugu Naviair-imit piffissami aalajangersimasumi timmisartut aallartut mittullu ikinnerunissaat eqqarsaatigigitsik oqaatigaa.

Nutaamik aaqqissuussinikkut mittarfissuup angallattunik amerlanerusunik sullissisinnaalernissaa anguniagaavoq.