Timmisartut F-16-it Nunatsinni
Tamatumunnga peqatigitillugu mittarfiit Pituffimmiittoq Kangerlussuarmiittorlu malersuutinik miffigineqarsinnaanersut misilissavaat.
Aatsitassarsiornerup soqutigineqarnerulernera patsisaavoq
Nunatsinni aatsitassarsiornerup soqutigineqarnerulernera umiarsuarsuillu takornariartaatit issittup imartaanukartartut amerliartornerat tamatumunnga patsisaavoq.
- Sinerissamik nakkutilliinermut tunngasut, soorlu nakkutilliinerit, imaatigut annaassiniarnerit aamma immanik avatangiisinik mingutsitsisinnaanermut sillimaniarnerit assigisaallu paasisassarsiorfiginiarneqarput, sakkutuunummi aningaasaliissutit ilaat tamakkununnga atorneqarsinnaammata, illersornissamut ilinniarfimmi pisortaq Niels Vang taama oqarpoq.
- Matumani pineqartumi issittumi najuunnikkut tamaani angallanneq nakkutigineqarsinnaavoq, ilaatigut angallannerup killilersimaarneqarsinnaanera anguniarlugu, Niels Vang oqarpoq.
Malersuutit ulluni tulliuttuni qulaavaassapput
Kalaallit Nunaata sineriaa Nunarsuup kaajallanneranit isorartuneruvoq, maannalu tamatuma ilamininngua, tassa Pituffimmit Kangerlussuarmut silaannakkut 1.200 kilometerinik isorartussusilik, malersuutinit taakkunannga ulluni tulliuttuni qulaavaaneqassaaq, taakkulu assilisanik radarikkullu nalunaarsukkanik Nuummi Issittumi sakkutooqarfimmut toqqaannartumik nassiussisassallutik.
- Taakku alapernaarsuutitut piukkunnarluinnartuunerisa atorneqarsinnaanerat misilerarneqassaaq, Niels Vang oqarpoq.
Siunissami Nunatta silaannartaani timmisartunik malersuutinik, qaammataasanik timmisartuaqqalluunniit inuttaqanngitsunik nakkutilliisoqarsinnaanissaa, politikerit immikkullu ilisimasallit piffissami sivitsortumi taakkartortarpaat.
Malersuutit F-16-it misissueqqissaarnermi ilaapput
Malersuutit F-16-it taakku pingasut misissueqqissaarnermi annerusumi ilaapput. Tamanna ilaatigut attuumassuteqarluni tamaani uuliamik, gassimik aatsitassanillu allanik soqutiginninnerup anneruleriartornera, tamatumalu peqatigisaanik sikuusarnerata minneruleriartornera.
- Tamatuma kinguneranik umiarsuit tamaani angallannerulerput, soorlu umiarsuarsuit takornarianik angallassisartut amerliartorlutik.
- Tassa tamatuma kinguneranik umiarsuit inuppassuillu tamaani angallatileramik. Tamakkua tamaasa patsisigalugit taavani suliarisartakkavut nalilersoqqittariaqaleratsigik, Niels Vang naggasiivoq.
