Timmisartut aquttoqanngitsut alapernaarsuutigerusuppaat
Folketinngimi illersornissamut ataatsimiisitaliami ilaasortat ullaap tungaani nunarput oqaluuseraat, tassani oqaluuserineqarluni Kalaallit Nunaanni issittumilu qanoq pitsaanerusumik nakkutilliisoqarsinnaannersoq.
Konservatiivit illersornissamut oqaaseqartartuata, siornatigullu nunanut allanut ministerip Lene Espersennip paaserusuppaa qanoq kunngeqarfik pitsaanerusumik nakkutigineqarsinnaanersoq.
- Misissorneqarsinnaannerluni ungasianiit timmisartut aqunneqartartut aamma droninik taaneqartartut, Kalaallit Nunaani atorneqarsinnaanersut. Timmisartummi ungasianiit aqunneqartartut atorlugit pitsaanerusumik nakkutilliisoqarsinnaavoq, soorlu aamma umiarsuit angalasut tassuuna nakkutigineqarsinnaasut, Lene Espersen, illersornissamut ministerimut taama apeqquteqaateqarpoq.
Venstre sinnerlugu illersornissamut ataatsimiisitaliami ilaasortaq Kristian Pihl Lene Espersenip siunnersuutaanut aamma tapersiissuteqarpoq. Taanna isumaqarpoq Kalaallit Nunaanni, aatsitassanik qaqutigoortunik qalluisoqarnissaa pissutigalugu, timmisartut ungasianiit aqunneqartartut atorneqarsinnaanissaat tulluartoq.
Siunnersuuteqartut illersornissamut ministerimit Nick Hækkeruppimit ilassilluarneqarput.
- Isumaqarpunga illersornissap iluani timmisartut ungasianiit aqunneqartartut Kalaallit Nunaani atorneqarsinnaanissaat isumassarsiatsialaasoq. Timmisartut ungasianiit aqunneqartartut sivisuumik timmisinnaapput, taamaalilluni nunarujussuarmut akikitsumik nakkutilliinissaminnut tulluartuusinnaallutik,
Illersornissamut ministeri Nick Hækkerup taama oqarpoq.
Timmisartut ungasianiit aquttakkat, 2007-imiilli Afganistaanimi nakkutilliisutut atorneqalerput.
