Timmisartut angallannerannik aqutsinerup nunatsinnut nuunneqarnissaa Naviairip siunnersuutigigaa

Nunattalu silaannartaani qutsinnerusumi timmisartumik angallannerit Canadamiit Islandimiillu aqunneqarput. Nunatsinnilu timmisartukkut angallannermi aqutsinerit tamaviisa nunatsinniit aqunneqalernissaat Naviairip maanna siunnersuutigaa.

- Kalaallit Nunaata silaannartaani angallannerit tamaasa Kalaallit Nunaanniit aqunneqalissasut Namminersorlutik Oqartussanut siunnersuutigaarput. Maanna sumiiffinni assigiinngitsuniit pingasuniit aqunneqarpoq, Nuummiit timmisartut atsinnerusumi angallattut aqunneqarput, qutsissumilu angallattut Canadamiit Islandimiillu aqunneqarlutik. Naviairip tamanut attaveqarnermut pisortaa, Bo Pedersen, oqarpoq.
 

Silaannakkut angallannerit Kalaallit Nunaanniit nakkutigineqarsinnaasut

Timmisartut angallannerannik aqutsineq ukiut 50-it missaat matuma siorna atortorissaaruteqarpallaanngimmat nunatsinnut Canadamut Islandimullu suliassanngorlugit avinneqarput. Ullutsinnili pitsaanerusunik atortorissaaruteqarmat, Timmisartukkut angallattut tamarmik nunatsinniit aqunneqarsinnaasut, Naviairimi isumaqarput.

- Taamani kabelinik allanillu atortorissaarutinik atuinissaq pinngitsoorneqarsinnaanngilaq. Massakkut satelliteqarpoq digitalinillu atortorissaaruteqarluni. Taamaammat Islandimituulli Canadamisuulli Kalaallit Nunaanni silaannakkut angallannerit Kalaallit Nunaanniit nakkutigineqarsinnaapput, Bo Pedersen oqarpoq.

Nunatsinniillu tamakkiisumik nakkutilliinerit aqunneqaleraluarpata Kalaallit Nunaannut iluaqutaassasoq, Naviarimi isumaqarput.

- Kalaallit Nunaanni suliffinnik pilersitsissapput, akileraarutitigullu isertitsissutaassallutik. Piffissallu ingerlanerani suliffik kalaalliniit aqunneqalerluni, soorlu ilinniartitsinerit aamma pilersillugit. Tassalu timmisartunik aqutsisut kalaallit Nunaannersuussallutik. Tamanna Kalaallit Nunaannut piginnaasaqalersitsisinnaavoq. Isumaqarpugut tamanna tamanit ajunngitsutut nalilerneqassasoq, Naviairip tamanut attaveqarnermut pisortaa, Bo Pedersen, oqarpoq.