Timmisartup nakkarnera: Timmisartup ingerlatsisui umiarsuup nakorsaanit misissorneqartut

Timmisartoq marlunnik ilaasoqartoq Qaqortup kujataa-kitaatungaani ippassaq nakkarpoq.

Timmisartulli ingerlatsisui marluk ajoqusinngillat, Issittumi Sakkutooqarfilli Tritonip gummibådinik minutsit 30-t qaangiuttut apuummat timmisartumik ingerlatsisut timmisartumit annanniummut ikisimapput.

Issittumi Sakkutooqarfik Facebookikkut allappoq. Kalaallit Nunaanni Politiit suliamik maanna isumaginnittussanngorput.

Inuit marluk Kalaallit Nunaanni Politiit oqarnerat naapertorlugu tyskiusut annaassiniarnerup kingorna Tritonimukaanneqarput.

- Ajunngillat. Tritonimi umiarsuup nakorsaanit misissorneqarput, kingornalu politeeqarfimmut killisiorneqariartorlutik, Kalaallit Nunaanni Politiit pigaartuisa pisortaat, Annette Ostenfeldt oqarpoq.

Timmisartoq tyskisut nalunaarsorsimasoq Canadamit Narsarsuarmukarnerani Issittumi Sakkutooqarfik timmisartumit mayday-imik nalunaarfigineqarpoq, tamatumalu kingunitsianngua imaanut nakkarpoq.

Timmisartumik ingerlatsisut marluk Tritonimit gummibådimut ikineqartut uani takuneqarsinnaavoq. Assi © : Arktisk Kommando

Ajornartoornermi mittariaqarnermut pissutaasoq imaani ajutoornerit pillugit ataatsimiititaliaq peqatigalugu paasiniarneqassaaq, pigaartullu pisortaata oqarnera naapertorlugu tamanna sivisusinnaavoq.

Timmisartoq Challenger sumiiffimmut aamma aallartinneqarpoq. Timmisartumillu ingerlatsisut marluk annanniummit timmisartumut aalaterisimasut, Issittumi Sakkutooqarfik Facebookikkut allappoq.