Timmisartunik qaartitsiniaraluit tigusaasut

Peqqarniisaarniat timmisartoq ilaasortaat qaartinniarlugu pilersaaruteqartut tuluit politiivinit paasineqarmata Tuluit Nunaanni innuttaasut upalungaarsimanertik sutigut tamatigut sukateriffigaat.

Europami timmisartoqarfiit annersaanni Heathrowip timmisartoqarfiani tuluit politiivisa unnuaq timmisartut aallartussat unitsimmatigit nunuarsuup sinneranut erngerluni malunniuppoq. Timmisartut Heathrowip timmisartoqarfianukartut aamma mitsinneqartassanngitsut kingusinnerusukkut aalajangertoqarpoq.

- Tuluit Nunaanni nunanilu allani peqqarniisaartoqannginniassammat politiit unnuaq ulapipput, tuluit nunap iluani pissutsinut ministeriat politiit timmisartoqarfimmi iliuuserisimasai pillugit ullaaq taama oqarpoq.

Tuluit politiivi oqaaseqarusunngikkaluartut tusarfinnit tutsuiginartunit nalunaarutigineqarpoq peqqarniisaarniat timmisartut ilaasortaatit qulit qaartinniarlugit pilersaaruteqarsimasut, qaartartut nammattakkaminnut ikillugit timmisartumut ikisinnarlutik timmisartut Tuluit Nunaanniit Amerikaliartut timmillutik qullasinnerpaaffissaminniilerpata qaartitsiniarlutik pilersaaruteqarsimallutik.

Skotland Yardimi Tuluillu Nunaanni isertorlutik paasiniaasartoqatigiit suleqatigiillutik peqqarniisaarniat qaammatini arlalinni malinnaavigivaat unnuarlu tigusaralugit. 21-t politiinit suli tigummigallaagaapput. Politikommissæri taakkunannga oqaloqateqarsimasoq oqarpoq peqqarniisaarniat sakkortoorujussuarmik timmisartunik qaartitsisarniarlutik pilersaaruteqarsimagaluartut.

USA-mi nunap iluani upalungaarsimanissamut ministeri oqarpoq Tuluit Nunaanni peqqarniisaarniat tiguneqaraluartut allatigut saassunneqarnissaq

sillimaffigineqartariaqartoq.