Timmisartuni saqisut sisamanngorpat suliumajunnaassapput
Taamaattorli bilitsisiaminnut atatillugu aningaasartuutiminnik annaasaqarnissaat pinngitsoortinniarneqartoq, Air Greenlandimi tuniniaanermut ussassaarinermullu pisortaq Christian Kjeldsen oqarpoq.
- Suliffeqarfiuvugut aningaasarsiornermik tunngaveqarluta ingerlatsisut, ilaasorisartakkavullu suliffeqarfitta iluani aaqqiagiinnginnermit sapinngisamik minnerpaamik eqqugaanissaat sulissutigissavarput. Taamaattumik suliumajunnaarnerup aallartinnerani ilaasunut timmisartuussinissanut allanut nuussinermik aamma bilitsinik utertitsisinnaaneq neqeroorutigissavarput, Christian Kjeldsen oqarpoq.
- Aallaqqaammut nalunngilarput, sisamanngorpat juulip 23-anni suliumajunnaartoqassasoq. Taamaattumik tamatuma aallartinnginnerani ilaasussaraluavut attaveqarfigissavavut, allamullu ilaanissaannik neqeroorfigalugit. Ataasinngornermi, marlunngornermi, pingasunngornermilu killilimmik inissaqarpoq, taamaattumik sisamanngorpat ilaasussaraluavut ulluni taakkunani ilaasinnaanissaannik neqeroorfigissavavut.
- Aamma angalanissaq pingaaruteqarpallaanngitsutut isigigaanni taamaatikkallarneqarsinnaavoq, kingusinnerusukkullu angalanissaq aalajangiukkaanni bilitsi utertinneqarsinnaavoq, matumani apeqqutaatinnagu bilitsi aappaluttuunersoq nalinginnaanersorluunniit. Suliumajunnaarnerup nalaani taamatut periarfissaqartitsiniarpugut, Christian Kjeldsen oqarpoq.
Taanna aperineqarani ilaasussaraluit nammineq saaffiginnissanersut imaluunniit Air Greenlandimit saaffigineqassanersut akivoq, sisamanngorpat ullormi suliumajunnaarfiusumi siullermi saaffigisinnaasavut toqqaannartumik saaffigissavavut, ilaasussanut apeqqutissalinnut e-mailikkut oqarasuaatikkulluunniit saaffigineqarsinnaasumik pilersitsissaagut, apeqqutit piaartumik akineqarsinnaaniassammata. Paasiniaavigineqarsinnaasoq aqagu ullaakkut Kitaani ullaakkut nalunaaqutaq arfineq pingasuniit saaffigineqarsinnaalissaaq. Sisamanngornermi angalasussat suliumajunnaartoqarneranit eqqugaasussat 1800-t missaanniipput, Christian Kjeldsen oqarpoq.
Taanna aperineqarami suliumajunnaarneq suliffeqarfimmut ullormut qanoq akeqassanersoq, akivoq tamanna naatsorsoruminaatsoq, taamaattorli ulloq ataaseq millionilikkaanik annaasaqaataassasoq oqaatigalugu.
Apeqqutigineqarmat taava annaasaqaataasussat amerlivallaannginnerini saqisut piumasaqaataat akueriinnaraanni pitsaanerussannginnersoq Christian Kjeldsen akivoq, isummat tunngaviusut pineqarmata tamanna annerusumik oqaaseqarfigisinnaanagu.
Air Greenlandip oqarasuaataa paasiniaavigineqarsinnaasoq aqagu ammarneqartussaq normoqarpoq 34 33 44, tassa 34 33 44.
Taanna suliumajunnaartoqarnerata nalaani ullaakkut arfineq pingasuniit unnukkut arfineq pingasut tungaanut ammasassaaq. Aamma e-mailikkut uunga saaffiginnittoqarsinnaavoq: kontakt@airgreenland.gl - matumanilu airgreenland oqaatsitut ataatsitut allanneqassaaq.
