Timmisartumut ilaaneq aasaanerani akisunerulissagunarpoq

Akitsuutip Kalaallit Nunaanniit nunanut allanut angalanermi 164 kronemik qaffanneqarnissaa, naalakkersuinermik suliallit eqqartugassaannut ilaavoq.

- Air Greenland maanna tatineqarpoq, tassami aasami angalanermi iluanaarnerpaaffiusuni unammillerteqarami ukiumili ilaasukinneruffiusumi kisimiilluni angallassisuulluni. Allannguuteqarnikkut timmisartuutileqatigiit assigiimmik atugassaqartinneqalissapput, Jens B. Frederiksen oqarpoq

Taassuma erseqqissaatigaa timmisartuutileqatigiit allat aamma ukiumi angallassinissaminnut neqeroorsinnaasut.

Air Greenland taassuma saniatigut timmisartuutiminik amerlisaaniarpoq, tassami Dash-8-t marluk atulerniarpai, Air Greenlandip pisortaa Michael Binzer Sermitsiamut oqarpoq.

- Dash-8 ingerlaartillugu akikinneroqaaq iluarsartuunnissaa pisariunnginnerulluni orsussamillu Dash-7-imit atuinikinnerulluni. Taamaammat timmisartoq taanna atussagaanni iluanaarnarneruvoq. Kalaallit Nunaanni pissutsinut immikkut ittunut timmisartoq tulluarnerusoq imminullu akilersinnaanerusoq paasigutsigu allanik marlunnik aamma piniartussaavugut, Michael Binzer oqarpoq.

Dash-8-t upernaap ingerlanerani atorneqalernissaat naatsorsuutigineqarpoq aallaqqaammullu Islandimit Kangerlussuarmut timmisartuussinermi atorneqassallutik, aammali Narsarsuarmiit, Thulemiit, Kulusumiit Nuummiit Ilulissaniillu timmisartuussinernut atorneqartassallutik.