Timmisartumut ajutoortumut ilaasoq: Timmisartup natia sequmippoq issimaffigullu aputinillutik

- Ajutoornerup nalaani, pisoq paasinngilara. Aatsaat suut tamarmik qaanngiummata, pisoq paasilerpara. Milluta igalaakkut isigivunga, tassanngaannarlu paasilerpara inuit niaqqutik tigullugit punngasut. Massakkut paativeeruteqqavunga, soorlumimi pisoq ilumuunngitsoq, Michael Dahl Christensen oqarpoq.

Timmisartumi issimasut tamarmik, tarnip pissusaanik immikkut ilisimasalinnik oqaluussaqarput, misigisimagunillu angerlarsinnaanngorlutik angerlartinneqarlutik.

Islandimiup timmisartumi ilaasup Bjarni Olafssonip, misigisimasani ima oqaluttuaraa.

- Iluamik eqqarsarsinnaanngilanga. Aallaqqaamut naluara assakaasoq napisimasoq, kisianni tassa timmisartup assakaasua napisimavoq. Tassanngaanaq timmisartup natia sequmippoq, issimaffippullu aputinilluni.

Bjarni Olafsson tupassimaqaluni, ilaaqatini pillugit ima oqarpoq.

- Ilimagaara inuit tamarmik tupaqqarujussuartut, aamma timmisartumi inuttat uatsitulli tupaqqasimassaqaat. Kisianni tamanna pillugu, oqaaseqarusuppallaanngilanga.

Timmisartumik ajutoornerup kingorna, pisoq ima oqaluttuaraa.

- Eqimattanut marlunnut avinneqarpugut. Inuit ilai qallunaatut oqaluttuniipput ilaallu tuluttut oqaluttuniillutik. Inuit ilai misigissutsiminnik annissuisinnaapput, ilaallu annissuisinnaannatik. Misigissutsit suliarinissaat sivisusinnaassaaq, Bjarni Olafsson oqarpoq.

Bjarni Olafsson, timmisartumik ajutoornerup kingorna, ikiorneqapallannginnertik eqqumiigaa.

-Eqqumeeqaaq timmisartumiit, timmisartoqarfiup utaqqisarfianut pisuinnaratta. Tassami anorleraluaqisoq piusuinnarpugut. Tamanna eqqumeeqaaq, Bjarni Olafsson naggasiivoq.