Timmisartumik aquttoq misilittagaqarluartuuvoq

Timmisartortartup misilittagakissinnaanera ajutoornermut pissutaanngitsoq oqaatigineqarpoq.

- Timmisartuussinermi akisussaasoq timmisartumi naalakkatut misilittagaqarluarpoq, ukiuni 15-ini Air Icelandimi atorfeqarpoq, Kalaallit Nunaannut Nuummullu timmisartuussinermi aquttuusarluni, Air Icelandip pisortaanera Árni Gunnarson Nuummut ippassaq tikittoq oqarpoq.

Nuummiinnermini timmisartumi ajutoortumi sulisut oqaloqatigissavai.

- Timmisartup ajutoorneranut sunarpiaq pissutaanersoq suli paasinngilarput.

Timmisartup minnerata nalaani, minnissamut anorip sakkortunerpaaffissani inorpaa, timmisartullu minnginnerani timmisartoq alla tingeqqammerpoq, Árni Gunnarsoq erseqqissaavoq.

- Ajutoortoqarnera ajuusaarutigaarput, ajornerusumillu pisoqanngimmat qujamasuutigalugu, Árni Gunnarson oqarpoq.

Air Icelandip timmisartuani tallimanngormat ajutoortumi ilaasunit 31-usunit aqqaneq-marluk arfininngormat tarnip pissusaanik ilisimasalimmit immikkut ikiorneqarput.

- Persuarsiornanngitsumik ikiorneqarput. Tarnip pissusaanik immikkut ilisimasalinnit ikiorneqarput aamma angalaqqissinnaanerannik ikiorneqarlutik Árni Gunnarson aviisimi Sermitsiaq.AG-mi apersorneqarluni oqarpoq.

Ajutoortoqarsimatillugu misissuisartut Københavnimit Nuummut ullumi tikissapput, timmisartup tallimanngormat ajutoortup ajutoorneranut patsissaasoq paasiniariartorlugu.