Timmisartumik angalaneq akisunerulissaaq

Ukiukkut aasakkullu timmisartorluni angalaneq assigiinngitsunik akeqassaaq, tassa ukiumi angalaneq akikinnerussalluni aasamilu angallattoqarluarnerata nalaani angalaneq, akisunerussalluni.

Aasami angalanermi Kalaallit Nunaanni mittarfinnut akiliutigineqartartoq 59 koruuninik akisunerulissaaq, imarpik qulaallugu angalaneq 124 koruuninik akitsussalluni.

Mittarfeqarfiit 2003-mi kingullermik akinik qaffaapput.

- Mittarfinnik ingerlatsinerput aamma isummannaallisaanerput qaffassarniarutsigu, atortunik nutaanik pisisariaqarpungut, ilaatigut qatserisartut biilii aamma ukiumi mittarfinni aputaajaatit. Taamaaliunngikkutta ilaasunut mittarfinnillu atuisunut naammaginartumik sullissilernavianngilagut, Mittarfeqarfiit pisortaat Niels Kreutzmann nassuiaavoq.

Akit nutaat maajip pingajuanni atuutilerput, taamaattoq ilaasussat bilitsinik pisereernikut akitsuineq maluginavianngikkaat, Air Greenlandimit oqaatigineqarpoq.

- Bilitsinik pisinermik akitsuineq maannamiit malunnarseriissaaq.

Air Greenlandip Mittarfeqarfiit sinnerlugit akitsuut ilaasunut akiliutigitittarpaa. Mittarfeqarfiit akinik qaffaaniarunik ilaasut atuisullu kisiisa aningaasanik aallerfigisinnaavaat, Air Greenlandip tuniniaanermut pisortaa Udo Glasshoff oqarpoq.