Timmisartumi tigumiaannagassat sakkortuumik malittarisassiuunneqarput
Europami angalaniartilluta nassatassavut maluginiartariaqalerpavut. Europami mittarfeqarfinni malittarisassat nutaat ullut 14-t qaangiuppata atuutilissapput. Tarngutit, juicet kigutillu qaqorsaataat nassatatsinni tigummiaannarissaniittut sakkortuumik malittarisassiuunneqarput. Siuleriiaattorpassuit timmisartullu kinguaattoortalernissaat angalatitsivinnit ernummatigiineqarpoq.
Sillimaniarneq pitsanngorsarniarlugu peqqarniiserniartartullu sillimaffiginiarlugit malittarisassiortoqarpoq. Taama malittarisassiiniarneq Københavnimi mittarfimmi timmisartumut ilaasussat iluarisimaarpaat:
- Isumannaatsumik angallanneqarnissarput pillugu taama malittarisassiisimammata ajorinngilara, Københavnip mittarfiani ilaasussat ilaat oqarpoq.
Nassatat tigummiaannagassat nutaamik malittarisassiuunneqarneri novembarip arfernanni atuutilissaaq. Imeq, juicet, unngialernermi qaputserutissat, quliutit, tarngutit, kigutinut qaqorsaatit nassatani tigummiaannagassaniittussaatillutik immikkut tamarmik 1 deciliterikkuutaarlutik puussiaaqqanut akimut ersittunut immiunneqartassapput.
Ilaasussat sillimaniarneq pillugu misissorneqarnerini utaqqisussarpassuaqalersinnaaneq angalatitsivinnit ernummatigineqarpoq.
- Paasissutissiinissatsinnut sivikippallaarpoq. Puussiaaqqallu atorneqartussat qanorittuussanersut ilisimatinneqarnikuunngilagut. Naluarput qerisunut puussiaatitsinnut poortuisassanerluta, SAS-imi tusagassiisartut pisortaat oqarpoq.
Qerisut puussaat nalinginnaasut atorneqassanngillat. Piumasaqaatit nutaat naapertorlugit puussiaaqqat immikkut ittumik nipitillugit matuneqartartussaapput. Puussiaaqqat malittarisassanut naapertuuttut pisiniarfinni pisiarineqarsinnaanngillat.
Naalagaaffiup mittarfeqarfiini qullersaqarfimmi tusagassiisartut pisortaat tamatumunnga ima oqarpoq:
- Pisiniarfeqarfiit qullersaqarfii attaveqarfigisimavagut malittarisassat nutaat atuutilernerisa kingunerisaanik puussiaaqqanik pisiniartussat arlaqarnissaannik ilimasaaraluta, naalagaaffiup mittarfeqarfiini qullersaqarfiup tusagassiisartuisa pisortaat oqarpoq.
Pisiniarfinni tunisaalernissaata tungaanut mittarfeqarfiit sillimmasersorsimapput.
Puussiaaqqat millionit affaasa missaat mittarfinni sillimmatigineqarput. Nassatat tigummiagassat kisimik EU-mi malittarissiuunneqarput. Meeraaqqat nerisassaat nakorsaatillu malittarisassiuunneqarsimanngillat.
