Tusagassiuut: Timmisartumi Sermitsiamut ajutoortumi boksi qernertoqanngitsoq
Timmisartumik aquttoq Italiami Tuluit Nunaannilu innuttaassuseqartoq, timmisartumik nutaaliamik Textronimik, Aviation Cessna T182-imik Sermitsiamut oktobarip 25-anni aporpoq.
Naalagaaffiup Silaannakkut angalannermi Ajutoornerit pillugit Misissueqqissaartarfia nalunaarusiami sapaatip akunnerata siuliani marlunngornermi saqqummersitamini allappoq.
Timmisartoq USA-mi naalagaaffimmiup ilaanit Kansasimit aallartoq Canada nunarpullu aqqusaarlugu Polenimi illoqarfiit pingaarnersaannut Warszawamut ingerlaartussaagaluarpoq. Timmisartoq Canadamukariartornermini Narsarsuarmut meqqaartussaagaluarpoq, nunattali kujataani silap ajornera pissutigalugu Nuummut ingerlaannarniarluni aalajangerpoq.
- Timmisartumik aquttoq Nuup Mittarfianut tikikkiartulinnginnermini appariartorpoq, uanilu nuissani silaannakkullu angallavik nakkutigineqanngitsoq silarluttoq aqqusaarpaa, nalunaarusiami allassimavoq.
- Timmisartoq apparsarnermi naammatsikkiartornerani 3.500 fodsip (2 kilometerit missaat aaqq.) naalaanniitsilluni Sermitsiamut aporpoq. Timmisartumi aquttoq ajunaarpoq timmisartorlu aserorluni.
Naviair, Issittumi Sakkutooqarfik aamma Kalaallit Nunaanni Politiit tamatuma kingorna timmisartumik nakkartumik timmisartumillu aquttumik ujaasineq aallartippaat. Timmisartoq ullut pingasut qaangiummata nassaarineqarpoq, timmisartumillu aquttoq ajunaarsimasoq paasineqarluni.
Timmisartumik aquttup Naviair AFIS-ilu attaveqarfigai
Tusagassiorfiup Sermitsiap, Henrik Jensen Naviairip 'Flight Information Center'-iani (FIC) ingerlatsinermut pisortaq ullormi ajutoorfimmi oqaloqatigaa.
- Narsarsuarmi nuiaqarlunilu erseqqarluppoq, putserlunilu, Nuummilu anorlerluni siannerpoq putsullu pukkillutik, taanna tusagassiuutinut oqarpoq.
FIC timmisartunullu paasissutissiinermut sullissivik AFIS Nuummiittoq timmisartumi aquttumut Nuummukariartortumut atassuteqarsimasut taassuma oqaatigaa.
FIC-ip Nuummiittup timmisartunut 19.500 fodsimik qatsitsigisumiittunut attaveqarneq suliarisaa, AFIS-illu timmisartukkut angallanneq mittarfiullu eqqaaniittut isumannaatsuunissaat qulakkeertarlugit.
- Timmisartumi aquttoq Goose Bayimit (Canadami illoqarfik aaqq.) aamma silamut ajortumut tassa Narsarsuarmukariartortoq Nuummukaannarniarluni aalajangermat attaveqarfigaarput. Timmisartoq Nuummukariartorluni FIC-imut radiokkut attaveqarpoq, Nuummullu qanillimmat attaveqarnera Nuummi AFIS-imut nuutsinneqarpoq, taanna oqarpoq.
Piffissarli ingerlalaareersoq AFIS-ip Flight Information Center attaveqarfigaa tassanilu timmisartoq attaveqarfigisinnaajunnaarsimallugu paasissutissiissutigaat, Sermitsiaq allappoq.
Tamatuma kingorna SAR aallartinneqarpoq.
Timmisartumi boksimik qernertumik soqanngitsoq
Upalungaarsimasut illersornissaqarfiullu timmisartumi aquttoq novembarip arfineq-aappaani nassaaraat tigullugulu. Uanilu timmisartumit atortoq Ajutoornerit pillugit misissueqqissaartartut misissuinerminni atugassaat aamma qulakkeerneqarluni.
Sermitsiap tassunga atatillugu Ajutoornerit pillugit misissueqqissaartartut pisortaat, Martin Puggaard misissueqqissaranermut atatillugu aamma oqaloqatigaa.
Taassuma timmisartumi 'boksimik qernertumik' soqanngitsoq ilaatigut oqaatigaa.
- Timmisartoq 5.700 kiilu ataallugu oqimaassuseqaraangat taanna piumasaqaataaneq ajortoq, Martin Puggaardip Sermitsiamut nassuiaatigaa.
Boksi qernertoq atortorissaarutaavoq, taakka immiussanik timmisartup ajornartoornermi minnissaa imaluunnit timmisartup nakkarnissaa sioqqullugu susoqarsimaneranik nassuiaasiinissamut ajornaannerulersitsisinnaasoq.
Timmisartoq qaqqap iigartaani qummukajaamiinnera pissutigalugu Ajutoornerit pillugit misissueqqissaartartut oktobarip 25-anni susoqarpiarsimaneranik inaarutaasumik inerniliissuteqarnissaanut ukioq ataaseq suli ingerlaqqaaratarsinnaasoq, Sermitsiaq allappoq.
- Pissarsiarisagut maanna misissorpagut – soorunami timmisartumit atortunit allanik pisariaqartitsivugut. Timmisartorli tikikkuminaalluinnarmat sumiiffimmilu silap pissusia pissutigalugu tikeqqinnissaa upernaamut aatsaat pisinnaanissaa piviusorsiorneruvoq, Martin Puggaard oqarpoq.
Issittumi Sakkutooqarfiup novembarip arfineq-aappaani qaqitsineranit video:
