Timmisartumi saqisut suliumajunnaarnissamik siorasaaripput
Taamatut sioorasaarinermik tusarliineq nunatta iluani avammullu angallattussanut ernumaammernarsinnaalluarpoq.
Timmisartunili inuttat sinniisaata Ajaaja Kofoed-ip isumaa malillugu suli ernumasoqartariaqanngilaq.
- Imatut paasisariaavoq: Aningaasarsiatigut isumaqatigiinniarnerit unittuuissappata aatsaat suliumajunnaartoqarsinnaavoq. Tassa juulip aallaqqaataani isumaqatigiissut atorunnaartussap tuaviornerpaamik iluarsiivigineqarnissaanut tinnersaarutitut taamatut nalunaaruteqarnerput paasineqartariaqarpoq. Ajaaja Kofoed taama oqarpoq.
Taassumalumi oqaaseqarnera naapertorlugu Air Greenlandimut isumaqatigiinniarnerit ingerlalluaqaat, tassalu juunip 25-iani suliumajunnaartoqariaannaanera isumaqatigiinniarnerni iluarsiisoqapallannissaanut tinnersaariniinnarnertut isigisariaqarsoralugu:
- Taamatut sioorasaarineq uagut inuttaasugut sakkussatuaraarput, piviusunngortinneqarnissaali ungasissupilussusoq erseqqersaatigerusuppara.
Ajaaja Kofoed, timmisartuni inuttat kattuffianni ACU-meersoq taama oqarpoq. ACU danmarkimi sullissisut kattuffiat ikiortiliullugu Air Greenlandimut isumaqatigiissusiorniarsaripput.
Tassuugu nalunaaqutaq arfineq marlunut Qanorooq aallartippat Air Greenlandip timmisartuini innuttaasut suliumajunnaariaannaanerat, Air Greenlandillu qisuariaataat suunersut sukumiinerusumik paasisaqarfigisinnaavatit.