Timmisartumi nakuusertoq akiligassarserujussuassaaq

Timmisartorsuup Danmarkiliartup Københavniliartilluni Islandimut nunnittariaqarneranut ilaasup pisuusup, minnerpaamik 100.000 koruuninik akiligassinneqarnissani naatsorsuutigissavaa.
februaarip 24-at 2010 09:28

Immikkut orsersorneq, sulisut sivisunerusumik sulinerat Keflavikimilu mittarfimmut akileraarummik akiliineq nunnittariaqarnerup kingunerai. Tamannalu tassa minnerpaamik 100.000 koruuninik naleqarpoq, ilaasumullu nakuuserniartumut taakku akiligassanngortinneqassapput.

Air Greenlandimi attaveqaqatigiinnermut sulisoq, Pia Christensen Bang taama ilisimatitsivoq.

Air Greenlandip timmisartorsua "Norsaq" Kangerlussuarmiit Københavnimut ingerlaartillugu ilaasut ilaat nakuuserniarpallaalermat, timmisartumi sulisut ilaasut isumannaatsuunissaat isumagisinnaannginnamikku, timmisartoq Islandimut nunnitsittariaqalerpaat.

Nakuusertoqarnerani ajoqusertoqanngilaq, nakuuserneq timmisartup iluani sulisut inaanni pimmat ilaasorpassuit malugisaqanngillat, Pia Christensen Bang oqarpoq.

Timmisartup iluani qanorpiaq pisoqarnersoq ilisimaneqanngilaq. Inuit ataasiakkaat pissusilersornerat pillugu Air Greenland aamma oqaaseqarumaneq ajorpoq.

Nakuusertoq Islandimi politiinut Keflavikimi tunniunneqareermat, ilaasut naatsumik paasissutissinneqarnissamik neqeroorfigineqarput.

Air Greenland assingusumik siornatigut misigisaqareerpoq, ilaasut arlaata nakuuserniarnera pissutigalugu allamut nunnittariaqarsimagami. Kisianni tamanna qaqutigut pisarpoq, qangarsuarlilu kingullermik taama pisoqarpoq, Pia Christensen Bang naggasiivoq.