Timmisartumi ilaasut aqqunartitertut
Timmisartumik piginnittoq Continental Airlines nalunaarpoq, 37-nit sisamat aqqunartiterujussuarsimasut.
Miamimiit 1100 km-isut ungasitsigisumiitillugu timmisartoq 168-inik issimasulik aqqanilinnillu inuttalik 11 km-isut qutsitsigisumiitilluni silaannaap aalarulunneranut pulariasaarpoq.
Aalarulunnerani inuit 37-t aqqunartiterput timmisartullu inuttaasa sumunnarfitsik allanngortillugu Floridami Miamimut mikkiartuinnarput minutsillu 85-it qaangiuttullu tassunga millutik. Continental Airlinesimeersut nalunaarput inuit qulingiluat napparsimmaviliaanneqartut sinnerilu mittarfimmi katsorsarneqarsinnaasimasut.
Silarlunnera pissutigalugu silaannaap aalarulunnera timmisartup radariani takuneqarsinnaasarpoq. Ilaannili erseqqarissorsuugaluartoq timmisartoq aalarulunnermut pulariasaarsinnaasarpoq, taamaammalluuna timmisartumi issiavigisamiitilluni qiterusersimajuartarnissaq timmisartut inuttaasa innersuussutigisaannaraat.
Timmisartumut ilaasartut silaannaap aalarulunneranik misigisaqakulalerumaartut silaannaap pissusaanik ilisimatusartut ippassigamikkunni oqaatigaat. Tamanna silaannaap kissakkiartuinnarneranik peqquteqarpoq, taamaanneranimi timmisartunut aalarulutsitsisinnaasumik kallikulanerulertussaavoq, ilisimatusartut aqutsisuat Jens Hesselbjerg silaannaq pillugu Danmarkimi allaffeqarfimmeersoq oqarpoq.
