Timmisartukkut angallassinermut inatsit 1950-kkornisaq suli atuuppoq
1950-kkunnili Danskit inatsisiliorput kinaluunniit qinnuteqaqqaartigani Kalaallit Nunaanut angalassanngitsoq. Taannalu inatsit suli maannamut atuuppoq.
Tamanna nunatsinnukarnianut akimmisaarutaasoq Josef Motzfeldt maanna Islandimiittoq isumaqarpoq.
Nunat avannarliit Islandimi ataatsimeersuarnerannut atatillugu Josef Motzfeldt, Ole Dorph, Johan Lund Olsen aammalu Jonathan Motzfeldt maanna Islandimiipput.
Taakku nunatta Islandillu akornanni timmisartukkut aqqut ilaatigut Islandip statsministeria peqatigalugu oqaluuseraat.
”Siullermik naalakkersuinikkut pissutsit qiviarutsigit qangali Danmarkip pissusaa tassaavoq; sunaluunniit nunatsinnut tunngasoq periarfissinneqassappat Danmarkimi oqartussaasut aatsaat akuersiteqqaarlugit tamanna pisinnaasassasoq”, Josef Motzfeldt oqarpoq.
Nangipporlu:
” 1950-kkunnili Islandip Danmarkillu akornanni silaannakkut angallannermik isumaqatigiissuteqartoqarsimavoq, tassani ilaatigut allassimavoq kinaluunniit piumallerlunilu Kalaallit Nunaannut timmisinnaanngitsoq, taamaattoqassappat qinnuteqaqqaartoqartariaqarpoq akuerineqaqqaartariaqarlunilu”, Josef Motzfeldt oqarpoq.
Taanna erseqqissaavoq, Islandip statsministerialu ippassaq tamanna oqaloqatigiissutigisimagitsik. Statsministerilu oqarsimavoq aasaq Danmarkimi pisortatigoortumik tikeraarnerminni timmisartuussinerit Islandimut Savalimmiunut nunatsinnullu ingerlaartartut eqqartorsimagitsik.
”Massakkut isumaqatigiissutigisarput tassaavoq, Danmarkimi angallannermut ministeriep kiisalu Islandimi transportministeriap taamatuttaaq nunatsinni naalakkersuisunngortussat nutaat suliassaasa siullertut naapeqatigiissutigissagaat taama eqartigisumik angallannikkut pissuseqartoqarnera, uffalu ukiarmili inatsisartut folketingillu akuereeraat nunatsinnut apeqqutinut tunngasut nunatsinni aalajangerneqarsinnaanngortut ”, Josef Motzfeldt oqarpoq.
Islandip Narsarsuullu akornanni timmisartuussineq ukiuni pingasuni isumaqatigiissutaasoq Namminersornerullutik Oqartussanit 2,5 mio. koruuninik tapiiffigineqartaraluarpoq. Ukiaq mannali ukiup pingasut taakku qaangiupput.
”Septemberip naanerani taanna naavoq. Nalinginnaasumik nunatsinni nunaqqatigut 100-t aperugutsigit aqqut taanna nalunngisaqarfigineraat, taava immaqa ataasiinnaq angissaaq. Taamaammat oqalussalluni aqqut taanna ilisimaneqannginnerarlugu, soorunami ilisimaneqanngippat taava ilaasussat naammattut pissarsiarineqarsinnaanngillat, Josef Motzfeldt.
Josef Motzfeldt isumaqarpoq, nunatsinniit ilaasussat annikigineqarpata, periarfissanik allanik ujartuisoqartariaqartoq.
-Timmisartuussisartut nunatsinnut soqutiginnittut kimmut kangimullu tamaasa ingerlassinnaasariaqarpaat, Josef Motzfeldt oqarpoq.
