Timmisartukkut angalaneq akikilleqqippoq
Timmisartukkut biletsit akikinnerit aappaluttunik taaneqartartut Air Greenlandip akikilleqqippai.
Biletsit aappaluttut akinut nalinginnaasunut naleqqiullugit 40 procentimik akikinnerulissapput, Danmarkimut 35 procentimik akikillissallutik. Biletsit aappaluttut sumunnaraluaraanniluunniit akikinneroqutaat siornatigut 30 procentiugaluarpoq.
Akit nutaat marsip aallaqqaataani atulertussat agguaqatigiissillugu koruuninik 100-paalunnik akikillissapput. Assersuutigalugu Nuummiit Københavnimut uterlugulu biletsi aappaluttoq 800 kr.-ngajannik akikillilluni 8.100 kr.-eqalissaaq.
Narsarsuarmiit Nuummut uterlugulu biletsi akikinneq 300 kr.-nik akikillilluni 2200 kr.-eqalissaaq, Nuummiillu Sisimiunut uterlugulu biletsi 200 kr.-nik akikillilluni 1566 kr.-eqalissaaq.
Biletsilli tamarmik akikillinngillat. Timmisartorsuarmi issiaviit akisunerit tapiat akitsorpoq maanna 1000 kr.-eqalerluni.
Air Greenlandip biletsinik akikinnernik akikilliliineranut pissutaatinneqarput suliassaqarnerulerneq kiisalu timmisartuutinik atortuutinillu atorluaaneq. Air Greenlandip pisortaa Flemming Knudsen oqarpoq pingaartumik Pituffimmut timmisartuussisarneq, allakkanik poortukkanillu assartuineq kiisalu timmisartunik atunngikkallartunik attartortitsisarneq timmisartortitseqatigiit ingerlanneqarneranut akikillisaataasut.
Biletsit akikillisat aqagumiit pisiarineqarsinnaalissapput.