Timmisartuaraq nassaarineqarpoq
Timmisartuaraq Kulusuup qeqertaani ullumi, kitaani nalunaaqutaq ataatsip missaani, nassaarineqarpoq.
Timmisartumik ingerlatsisoq, amerikamiu 34-inik ukiulik Paul Eriksmoen, ajunaarsimasoq nassaarineqarpoq.
Air Greenlandip qulimiguuata Bell 212-ip, naliginaasumik ingerlaartilluni timmisartoq, tammarneranit sapaatip akunnera qaangiummat, nassaaraa.
Timmisartuaraq inuinnarmik pigineqartoq Islandimiit, Keflaviimiit, Kulusummut sisamanngormat kingullermik ingerlaartilluni taammarpoq.
Tammarnerata kingorna timmisartut qulimiguulillu atorlugit ujaasisoqarpoq, ujaasinerli sila ajornera pissutigalugu ajornakusoorsimalluni.
Timmisartortartoq ajunaartoq kisimiilluni timmisartuaraq Europamit USA-liaallugu ingerlaarsimavoq. Paul Eriksmoen timmisartortartutut ilinniagaqarpoq, amerikamiullu timmisartuliortartuini nunarsuaq tamakkerlugu timmisartunik pisisunut timmisartunik angallassisussatut atorfeqarluni.
