Timmisartuaqqat ungasianit aquttakkat imaani angallannermik isumannaannerulersitsissapput
Immami sikulimmi angalanermut tamanna isumannaannerulersitsissasoq, Danmarkimi silasiorfimmi DMI-mi sikunut tunngasunut siunnersorti Jens Jakobsen oqarpoq.
Timmisartuaraq inuttaqanngitsoq ungasianit aquttagaavoq, aalajangersimasumik ingerlaarfilerlugu aqunneqarsinnaasoq, ingerlaarfimminilu qulaavaaffigisaminit paasissutissanik katersisinnaasoq - soorlu aqqutiminik assiliisarluni imaluunniit filmiliortarluni.
- Timmisartuaqqap inuttaqanngitsup assilisai atorlugit, iluliaminerit qaammataasat assilisaanit umiarsuulluunniit radariatigut takuneqarsinnaanngitsut takusinnaasarpavut, Jens Jakobsen DMI-mi sikunik nakkutilliivimmeersoq oqarpoq.
Timmisartuaqqap ungasianit aquttakkap assiliissutitallip kangerluk Qooroq Narsarsuarmit 8 kilometerinik kujasinnerusumiittoq assilisaqattaarpaa. Kangerluup taassuma paava iluliaqartaqaaq, taamaattumillu misiligutigalugu taanna qulaavaaneqarpoq.
Timmisartuaraq inuttaqanngitsoq taanna minutsini 24-ni timminermini 190-eriarluni assiliivoq.
Timmisartuaqqat inuttaqanngitsut silarluttumi aamma timmisinneqarsinnaapput aamma Tunup Avannaata imartaani sikumi sajuppillatsitsisarluni misissuinermi atorneqarsinnaallutik.
