Timmisartuaqqat inuttaqanngitsut annaassiniarnermi ikiorsiunneqassasut
Inuit Ataqatigiinneersoq folketingimut ilaasortaq Aaja Chemnitz Larsen, danskit illersornissamut ministeriannik Peter Christensenimik ippassaq ataatsimeeqateqartoq taama isumaqarpoq.
Illersornissaqarfiup Nunatsinni suliai ataatsimiinnermi eqqartorneqarput. Ministerillu nammineq kajumissutsimik upalungaarsimasussanik pilersitsisoqarnissaanut akuersaarluni nalunaaruteqarnera Aaja Chemnitz Larsenip nuannaarutigaa.
- Assigiinngitsunik aporfissaqartoq nalunngilarput, ilaatigut sila ungasissutsillu, aammali periarfissanik ullumikkut atorneqanngitsunik arlalinnik peqartoq ilisimavarput, Aaja Chemnitz Larsen ministeri peqatigalugu tusagassiorfinnut nalunaaruteqarluni taama allappoq.
AAMMA ATUARUK Illersornissamut isumaqatigiissummut peqataarusuttut
- Aamma sinerissami najugaqartuusugut peqataatinneqarnerunissarput pingaartuuvoq, illersornissaqarfiup politiillu suliaannut nalinginnaasunut tapertatut atorneqarluta, Aaja Chemnitz Larsen oqarpoq.
Aammattaaq teknikkikkut atortorissaarutit nutaat, soorlu timmisartuaqqat inuttaqanngitsut qaammataasallu, atorneqarsinnaanerat erseqqissaatigaa.
Illersornissaqarfiup Issittoq pillugu misissueqqissaarinerani, ukiup nikinnerani naammassineqartussatut naatsorsuutigineqartumi, Nunatsinni nammineq kajumissutsimik upalungaarsimasussanik pilersitsinissaq ilaatinneqartoq danskit illersornissamut ministeriata Peter Christensenip ilisimatitsissutigaa.
Nammineq kajumissutsimik upalungaarsimasussanik pilersitsisoqassanersoq illersornissaq pillugu 2016-imi ukiakkut isumaqatigiinniartoqarneranut atatillugu inaarutaasumik aalajangiiffigineqassaaq.
AAMMA ATUARUK Timmisartut aquttoqanngitsut alapernaarsuutigerusuppaat
Politikerit ataatsimiinnerminni allanik aamma eqqartugaqarput. Nunatsinni sakkutooqarfiusimasuni, ilaatigut Kangilinnguani, avatangiisinik saliinissaq, Illersornissaqarfiup ujaasisartui annaassiniartartuilu (SAR), amerikamiut Nunatsinniinnerat aammalu Nalagaaffeqatigiinni killeqarfitsigut aporfiusunut killiffik.
