Timmisartuaqqat alapernaarsuutit inuttaqanngitsut nunap 3D-mik assiliornissaanut atorneqalersut
Ingeniørit suliffeqarfiutaat COWI marlunnik taamaattuuteqarpoq, taakkulu ilisimatusarfinni tuluit pianni Cambridge Universitymi aamma Aarhus Universitetimeersut atussavaat.
COWI'p timmisartuaraataata Alaskamiittup immap sikuata issussusaa uuttortassavaa, taamatullu aqqutissaqqittunik ujarlertassalluni. Aammattaaq ilisimatusartut appelsiinat imaanut eqqassavaat, qalipaatertik orange pissutigalugu takujuminartuummata. Ilisimatusartunut naatsorsuruminarsissaaq uuliamik mingutitsinerup qanoq ingerlasarnera.
Nunap 3D-mik assiliornissaanut uuttortaanermut atorneqassapput
Kalaallit Nunaata Kangiata avannaani 3D-mik nunap assiliornermut timmisartuaraq alla atorneqassaaq, taamaalilluni Danmarkimi nunap assingatut eqqortigisumik nunap assiliortoqarsinnaalissalluni.
- COWI nunap assiliornermut immikkut ilisimasaqarfiuvoq, timmisartuaqqallu eqqartukkavut nutaanik misissuinissamut killeqanngiusartumik periarfissiissasut, Stephan Mølvig COWI-mi timmisartuaqqanut akisussaasoq DR-mut oqarpoq.
AAMMA ATUARUK Amerikamiut dronenik Alaskami misileraalersut
Alaskami timmisartuaraq sikumik silaannarmiit uuttortaassaaq, immamilu sikup ataani robotti ingiaqataalluni uuttortaassaaq; kingorna timmisartuaqqap uuttorsimasaanut naleqqiussassanik.
- Immap sikuata issussusaanik eqqoqqissaartumik uuttukkat inerneri pigilissavagut, tamannalu Rusland avannaqqullugu Kangianut imaatigut angalanermi pingaaruteqartupilussuusoq Stefan Mølvig oqarpoq.
COWI'p Atlantikup Avannaa assorsuaq tuniniaavittut soqutiginartutut isigaa.
- Ingammik Kalaallit Nunaanni aatsitassarsiortoqalissappat, suliffeqarfiup tuniniaanermi pisortaa Morten Krebs DR-mut oqarpoq.
AAMMA ATUARUK Timmisartuaqqat alapernaarsuutit inuttaqanngitsut akisuallaaqaat
