Timmisartuaqqanut apornissaq ernummatigaat
Timmisartup mikkiartornerani timmisartumi aquttut mittarfimmi timmisartunik mittunik aallartunillu nakkutiginnittoqarfimmit nalunaarfigineqarput mittarfiup eqqaani timmisumik suugaluarnersumik takusaqartoqartoq, Air Greenlandimi timmisartortitsinermi pisortaq Jacob Nitter Sørensen oqarpoq.
Air Greenlandip timmisartuutaani King Airimi aquttut silaannarmi timmisumik takusaqarsinnaannginnamik Ilulissat mittarfiannut minniarnertik unitsilllugu qullarteqqittariaqarsimapput, silaannarmilu timmisoq suugaluarnersoq takuneqarsinnaajunnaarmat aatsaat timmisartoq missinnaasimalluni.
Aamma atuaruk Issittumi takornariartitsisartut timmisartuaqqat inuttaqanngitsut inerteqqutigigaat
- Ernumassuteqalaarpugut, ungasianit aqunneqartartut siunissami naammattoortalertussaavagut, taakkuami nuannarineqartorujussuanngorput atorneqarnissaanullu malittarisassat amerlasuunit ilisimanneqanngillat, Jacob Nitter Sørensen Air Greenlandimi timmisartortitsinermut pisortaq taama oqarpoq.
Malittarisassat ullumikkut atuuttut malillugit ungasianit aqunneqartartut mittarfinnit 5 kilometerisut ungasitsigisumi taamaallaat atorneqarsinnaapput.
Malittarisassat taakkua malillugit nunarput tamakkerlugu timmisartuaqqat ungasianit aqunneqartartut atoqqusaanngillat.
Aamma atuaruk Mittarfik pillugu siunnersuut Ittoqqortoormiini ernumalersitsisoq
Jacob Nitter Sørensenip erseqqissaatigaa Ilulissat mittarfiata eqqaani pisoq allani naammattoorneqarsimanngimmat, siunissamilu timmisartumut ilaanissamut ernumassutissaqanngitsoq timmisartup ungasianit aqunneqartartoq apussagaluarpagu.
Aamma atuaruk Timmisartunut inuttaqanngitsunut Tunumi mittarfiliornissaq kissaatigineqartoq
- Ungasianit aqunneqartartut ima angitiginngillat aporneqarunik timmisartoq nakkarsinnaalluni. Taamaattorli timmisartoq ajoquserneqarsinnaavoq, tamannalu akisuvoq aamma ilaasunut toqqissisimanarani, Air Greenlandimi timmisartortitsinermut pisortaq Jacob Nitter Sørensen taama oqarpoq.
Ilulissat mittarfiata eqqaani silaannarmi timmisoq arfininngormat takuneqartoq suunersoq maanna misissuiffigineqarpoq