Timmisartorsuaq New Yorkimiit ullumi aallaruni Australiamut sapaatiuppat ullaakkut tikissangatinneqarpoq. Toqqorsivimmit assiAssi: Jason/Flickr Creative Commons

Timmisartortitseqatigiiffissuaq siullerpaamik nalunaaquttap-akunnerini 19-ini timmisartuussisussanngortoq

Timmisartortitseqatigiiffissuaq New Yorkimiit Sydneymut ullumi tallimanngornermi siullerpaamik toqqaannartumik timmisartuussisussanngorpoq.

Timmisartortitseqatigiiffissuarmi Qantasimi timmisartortartut ilaasullu nalunaaquttap-akunnerini 19-ini ingerlaassapput, taamalu sivisutigisumik timmisartuussinnissaq oqaluttuarisaanermi siullerpaamik misilinneqartussanngorluni. Timmisartummi ilaasunik angallassisartut siullersarissavaat.

Timmisartorsuaq New Yorkimiit Australiami illoqarfissuarmut illoqarfinnut allanut aqqusaanngivilluni Sydneymukassaaq.

Timmisartorsuaq New Yorkimiit ullumi aallaruni Australiamut sapaatiuppat ullaakkut tikissangatinneqarpoq.

Misiliinerit pingasuusussaapput timmisartuussinissarlu ullumi pisussaq siullertut misiliinerussaaq, aamma paasinarsissaaq sivisuumik timmisartuussineq ilaasunut timikkut tarnikkullu qanoq sunniuteqartarnersoq.

Qantassimi sulisut ilaasullu 40-t angalanissamut sivisuumut ilaaniarput, timmisartorsuarlu ilaaffissaat tassaavoq Boeing 787-9.

Timmisartorsuarmi ilaasussat killeqarput timmisartorsuummi 16.000 kilomiiterit ingerlaarfigisussaavai aqqutaanilu unittussaannginnami orsussaq naammattariaqassaaq.

Autraliami universitetini ilisimatuut marluk angalanissami aamma ilaassapput, ilisimatuut ilaasunut alaatsinaassapput - ilaasut timmisartornerup nalaani qanoq nerisaqariaaseqarnersut qanorlu sinittariaaseqarnersut alaatsinaassavaat.

Timmisartortartut aamma immikkut atortulerlugit malinnaaffigineqassapput, aquttummi piffissami sivisuumi timmisartornerminni qanoq qasuleriartornersut paasiniarneqarpoq.

New Yorkimi Sydneymilu nalunaaqutaat nalunaaquttap-akunnerinik 15-inik nikingapput, taamaattumik ilisimatuut nikingassutaat qanoq sunniuteqarsinnaannera immikkut misissussavaat.

Stephen Simpson University of Sydneyimeersoq taama oqarpoq.

Timmisartortitseqatigiiffissuaq Qantas Londonimiit Sydneymut qaammatini tulliuttuni timmisartuussinermik misilittaanissaminut aamma pilersaarpoq.

/ritzau/AFP

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat