Timmisartortartut suliamik suli unitsitserataannaapput
Air Greenland marlunngornermi ullaap tungaa nalunaarpoq sulisut mattunneqarnissaannik ilimasaarut suli atuuttoq. Akissaatit pillugit isumaqatigiinniarnerit nikeriarfiunngippata mattussineq atuutilissaaq sapaat januarip qulingiluaat.
Air Greenlandip marlunngornermi ullaap tungaa ataatsimeeqatigai Serviceforbundet aamma FPU kiisalu FFG akissaatit pillugit isumaqatigiinniarnernut atatillugu.
- Ataatsimiinnermi paasinarsivoq illuatungeriit suli imminnut ungasittorujussuusut. Service Forbundimit aallaavigineqarpoq ukiumut ataatsimut atuuttussamik isumaqatigiissuteqarnissaat Air Greenland piffissaq sivisunerusoq isigalugu aaqqiissuteqarnissamik siunniussaqartoq unammillersinnaassuseq nukittorsarniarlugu, taama Air Greenland nalunaarpoq.
Service Forbundet tassaavoq kattuffissuaq assigiinngitsunik ilaasortaqartoq ilaasortallu ilagaat timmisartumi aquttut kattuffiat FPU.
Marlunngornermi ataatsimiinnissaq sioqqullugu Service Forbundip isumaqatigiissitsiniartarfik Forligsinstitutionen kaammattorsimavaa isumaqatigiinniarnermut akuliutequllugu. Maannalu illuatungeriit utaqqiinnalerpaat isumaqatigiissitsiniartarfiup aggersaanissaa.
KNRimi eqqaaneqartareersutut Air Greenland sulisuni mattussinissamik ilimasaaruteqarpoq sapaat januarip qulingiluaaniik. Tamanna pissappat sulisut atorfimmut atatillugu inigisaminnit anisitaaratarsinnaapput aammalu Air Greenlandip paaqqinnittarfianiittuuteqarunik meeraat tassani paarineqarsinnaajunnaassallutik.
- Ullumikkut ataatsimiinneq isumaqatigiinniarnertut isiginngilarput. Oqaatigerusunneruarput tassaasoq isumaqatigiinniarnissamut periarfissaqarsinnaaneranik misissuinertut, taama KNRimut oqarpoq FPU-mi siulittaasoq Per Fallentin.
- Oqaatigisinnaavarput nikeriartoqarsimanngitsoq maannalu isumaliutigaarput iliuusissarput tulleq suussanersoq. Ullup ingerlanerani paasinarsisimassaaq iliuusissarput tulleq sunaajumaarnersoq, taama Per Fallentin oqarpoq.
