Timmisartortartut sakkortuumik isornartorsiorneqarput
Kalaallit Nunaanni Sulisitsisut peqatigiiffianni pisortap timmisartortartut sakkortuumik isornartorsiorpai, Nunatsinnilu innuttaasunik sallunaveeqqutitut tiguaasutut timmisartortartut taallugit, inuinnarnit misiginneqatigineqarnavianngitsut isumaqarpoq:
- Inuiaqatigiinni allanut sanilliullutik taama pissarissaartigereersut, suli aningaasarsiaqarneruniarlutik sulinerminnilu pissutsinik pitsanngorsaaffigineqarusullutik, inuiaqatigiit ingerlanerat unitsikkunikku, innuttaasut akornanni misiginneqataaffigineqarnavianngillat, Sulisitsisut Peqatigiiffianni pisortaq Henrik Leth oqarpoq.
Timmisartortartut sinnerlugit isumaqatigiinniartup, Toni Rütkønenip isornartorsiuineq isumaqatiginngilaa, oqarlunilu Air Greenland-imeersut piumasarisatik allanngortikkusunnagit manngertiserpallaartut.
- Inuiaqatigiit sallunaveeqqutisullusooq tigusarisutut perusunngikkaluarluta naapitsiniaasimagaluarpugut, Air Greenlandimiilli piumasaqaatitik allanngortikkusunngivippaat, Toni Rütkønen oqarpoq.
Taanna malillugu Kalaallit Nunaanni Sulisitsisut timmisartortartut allanut sanilliullutik sivikinnerungaartumik sulisarnerarunikkit kukkusumik naatsorsuisimassasut, eqqunngitsunillu paasissutissinneqarsimassasut.
- Timmisartortartummi angalanermik saniatigut piareersartariaqartarput, angerlarsimaffimminni suliartoqquneqarnissaminnut piareersimatitaasarlutik, sumiiffinnilu assigiinngitsuni unnuisariaqartarlutik. Tamakkua tamaasa eqqarsaatigigaanni timmisartortartut sapaatip akunneranut akunnerni 60-ini sulisinneqartarsinnaapput, Toni Rütkenen oqarpoq.
Kalaallit Nunaanni Sulisitsisut peqatigiiffialli isumaqarpoq, suliffeqarfiit Air Greenlanditut ittut unammillersinnaassappata, aningaasarsiaqarnernut malittarisassat allanngortinneqartariaqartut. Taamaammat isumaqatigiinniarnerni inissisimaneq pisariaqartutut, Kalaallit Nunaanni Sulisitsisut peqatigiiffianni pisortap, Henrik Leth-ip oqaatigaa.
