Timmisartortartut qinngornernik akornusersorneqartarput
Inuit kikkuugaluarnersut laserit atorlugit timmisartortartunik akornusersuisarput, soorlu Kastrupip ungasinngigisaanit ippassaq akornusersuisoqartoq.
Nukappiarapiluusaarniat Nuup mittarfiani qaammatit arfinillit matuma siornatigut aamma taamaaliortut, Air Greenlandip ilisimatitsissutigaa.
Air Greenlandip timmisartorsua Kastrupimut januaarimi mikkiartulersorlu laserip qinngornerinik eqqorneqarsimasoq, issimasut ilaata oqaatigaa.
Air Greenlandilli timmisartortartuisa tamanna suli uppernarsinnaannginnerarpaat, laserip qinngornerinit akornusersorneqarsimanerlutik oqaatigisinnaannginnamikku.
Qinngornerit taakku timmisartumik ajoqusiisinnaanngillat, timmisartortartunulli ulorianarsinnaallutik.
Qinngornerit inngianarsinnaapput, mikkiartulernermilu akornutaasinnaallutik. Laserip qinngorneri ulorianarluinnarsinnaasut, allaat inuit inuunerannik akeqarsinnaasut, Air Greenlandip erseqqissaatigaa.
