Timmisartortartut: Nukatsitaanngilagut
Timmisarsartortartut sapaatiummat unnuaqeqqanulli mattunneqarnermik kingorna, aatsaat siullermik tusagassiuutinut qisuariaateqarput.
Tusagassiutinut allakkaminni oqaatigaat, qatsulluinnarlugu nukatsitatut taagorneqarnertik. Taamatullu Air Greenland avammut tusagassiisarneri eqqunngitsortaqartartut.
- Sulisitsisutta aningaasanik isumaqatiginninniarnermi qiviarsimanngilaat, sulinitsinni piffissaq annertooq atortaripput piareersimatinneqarnermut. Timmisartortartut 60 %-ii, sapaatit akunneranut 60 tiimit Air Greenlandimit atorneqarsinnaasarput, taamak allapput timmisartortartut tusagassiuutinut nalunaarumminni.
Timmisartortartunik mattussineq tunngavilersorpaat, pissaaneqarnermik takutitsiniaanerusoq.
- Una akiuunneq tunngaveqaraluarpoq, aningaasarsianut isumaqatiginninniarnermik. Maannali Air Greenlandimi timmisartortartut saqisullu peqatigiiffianniiit isumaqarfigaarput, pissaanneqarniunnermik tunngaveqalersoq.
Air Greenlandip pisortaa Michael Binzerip, tusagassiuutinut oqaatigisimasaa timmisartortartunittaaq qisuariarfigineqarpoq.
- Michael Binzer timmisartortartunut oqarmat timmisartortartut tunniutiinnartariaqartut, ersertitsiinnarpoq timmisartortartut peqatigiiffiannut unammisoq. Taamak isumaqarlutik allapput timmisartortartut, saqisullu peqatigiiffiat.
Timmisartortartut saqisullu kattuffiat ACU, Air Greenlandip mattussinera ima oqaasertalerpaat.
- Misigisimavugut sallunaveeqqutitut atorneqarluta, taamak ACU tusagassiuutinut nalunaarumminni allapput.
ACU-miit timmisartortartullu peqatigiiffianni siulittaasoq oqaaseqartinniarsimagaluarparput iluatsinngitsumillu.